Me kallash në krah hap zjarr në mes të qytetit, pamje si në filma nga Kosova

Qyteti i Podujevës në Kosovë u trondit mesditën e kësaj të mërkure, pas përdorimit të armës së zjarrit në një nga rrugët me frekuentim të lartë, “Zahir Pajaziti”.

Në pamjet që po bëjnë xhiron e rrjetit një i ri duket të ketë qenë protagonist i ngjarjes. Ai shihet me kallashin në dorë duke lëvizur lirisht në qytet dhe sipas policisë ka përdorur armën për të shtënë në ajër, por fatmirësisht nga ngjarja nuk ka të lënduar.

E gjithë skena është raportuar se ka ndodhur rreth orës 13:30, sipas zëdhënëses së Policisë së Kosovës për Rajonin e Prishtinës, Flora Ahmeti.

“Rreth orës 13:30 është raportuar për një gjuajtje me armë zjarri në rrugën ‘Zahir Pajaziti’ në Podujevë. Bazuar në të dhënat fillestare, nuk raportohet për persona të lënduar. Menjëherë pas marrjes së informatës, policia ka dalë në vendin e ngjarjes dhe ka arrestuar personin e dyshuar”, tha Ahmeti për mediat.

Ajo ka bërë të ditur se Policia e Kosovës ka nisur hetimet lidhur me rrethanat që e karakterizojnë rastin.

Ndërkohë, në një video të publikuar nga media Kosovare Kallxo, autori shihet teksa tenton të largohet nga vendi i ngjarjes pasi ka shtënë në ajër me kalash. Gjatë tentativës për t’u arratisur i dyshuari rrëzohet në asfalt.

Pavarësisht përpjekjes për t’u larguar, Policia e Kosovës ka arritur ta lokalizojë dhe ta arrestojë atë.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)