Ish-ministri vetëofrohet për president i Kosovës

Ish ministri Arsim Bajrami ka shprehur gatishmërinë për të kandiduar për president të Kosovës, duke e paraqitur veten si figurë konsensuale në një moment kur vendi duhet të zgjedhë kreun e ri të shtetit brenda afatit kushtetues, deri më 4 mars.

Mandati i presidentes aktuale, Vjosa Osmani, përfundon në prill, ndërsa pa zgjedhjen e presidentit rrezikohen zgjedhje të parakohshme parlamentare.

Bajrami kërkoi mbështetjen e partive kryesore parlamentare dhe theksoi se i plotëson kushtet profesionale, politike dhe morale për të garantuar unitet dhe funksionim kushtetues të institucioneve.

Si një nga hartuesit e Kushtetutës, Bajrami duhet të sigurojë 30 nënshkrime deputetësh për kandidim dhe dy të tretat e votave në Kuvend për t’u zgjedhur. Ende nuk është e qartë nëse do ta marrë këtë mbështetje.

PDK ka paralajmëruar se mund të propozojë kandidat, ndërsa Osmani synon mandat të dytë. Mungesa e konsensusit politik ka shtuar rrezikun e një krize të re institucionale, pas një viti të vështirë për Kosovën me bllokada dhe pasoja financiare.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)