Hapet ura e re për këmbësorë mbi lumin Ibër, Kurti mesazh BE-së për largimin e KFOR nga ura kryesore e Mitrovicës

Ura e re mbi lumin Ibër, që lidh Mitrovicën e Jugut me shumicë shqiptare dhe Mitrovicën e Veriut me shumicë serbe, 52 ditë nga nisja e punimeve është hapur zyrtarisht për qarkullimin e këmbësorëve. Përurimi u bë nga kryeministri në detyrë, Albin Kurti, ushtruesi i detyrës së ministrit të Infrastrukturës, Hysen Durmishi, si dhe kryetari i Mitrovicës së Jugut, Faton Peci.

Gjatë ceremonisë, kryeministri Kurti theksoi se qëndrimi i qeverisë së Kosovës mbetet i pandryshuar lidhur me urën kryesore mbi lumin Ibër, duke theksuar se ajo duhet të jetë e hapur në mënyrë të përhershme.

Foto: Facebook/Albin Kurti

“Në çdo takim me ndërkombëtarët e përsërisim qëndrimin tonë që ura mbi Ibër duhet të jetë përherë e hapur. Kemi gjithsej 77 ura mbi lumin Ibër; shumica janë në Kosovë, disa në Mal të Zi dhe Serbi, por e vetmja urë që ka persona të uniformuar mbi të gjatë gjithë kohës është ura kryesore mbi Ibër”, tha Kurti.

Ai shtoi se nuk sheh nevojë për praninë e vazhdueshme të pjesëtarëve të KFOR-it në urë, duke theksuar se çështjet e tilla duhet të zgjidhen përmes dialogut.

“Besoj që nuk ka nevojë që aty të jenë pjesëtarët e KFOR-it. Këtë çështje e zgjidhim me bashkëbisedim të hapur dhe dialog të sinqertë. Besoj se do të vijë edhe dita kur edhe ajo urë do të jetë e hapur. Urat nuk kanë përkatësi etnike. Urat mbi Ibër janë ura të Mitrovicës dhe të mitrovicasve, pa dallim”, u shpreh Kurti.

Foto: Facebook/Albin Kurti

Duke folur për rëndësinë e hapjes së urës së re për këmbësorë, Kurti theksoi se kjo do të ndikojë drejtpërdrejt në rritjen e mobilitetit dhe qarkullimit në qytet.

“Me këtë urë rritet qarkullimi dhe mobiliteti në Mitrovicë, një qytet kaq i rëndësishëm për republikën tonë. Falënderoj operatorin ekonomik, ushtruesin e detyrës së ministrit, Hysen Durmishin, kryetarin e ri Faton Pecin dhe të gjithë qytetarët e Mitrovicës që kanë kontribuar për të ardhur në këtë ditë të bukur”, tha ai.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)