Sekuestrohen 5 tonë marijuanë në Serbi

Një sasi rekord prej 5 tonësh marijuanë janë sekuestruar nga policia në Serbi. Sekuestrimi, i cili është më i madhi i realizuar ndonjëherë nga policia serbe është bërë në fshatin Konjuh të Krushevcit.

Lajmi është konfirmuar nga Ministri i Punëve të Brendshme të Serbisë, Ivica Daçiç, i cili deklaroi nga vendngjarja se vlera e drogës së sekuestruar vlerësohet nga 7 deri në 10 milionë euro, ndërsa sipas vlerës së tregut në rrugë ajo mund të arrijë deri në 50 milionë euro.

Foto: Policia serbe

Në kuadër të aksionit janë arrestuar babë e bir, R. S. 68 vjeç dhe N. S. 40 vjeç, ndërsa policia është në kërkim të një personi tjetër që dyshohet të jetë organizatori i grupit kriminal. Ata akuzohen për prodhim dhe shpërndarje të paligjshme të lëndëve narkotike, si dhe për posedim dhe trafik armësh.

Marijuana është gjetur në pronën familjare të të dyshuarve, ku janë sekuestruar edhe katër armë automatike, një mjet antitank “zolla” dhe municion. Sipas Prokurorisë për Krim të Organizuar, droga ruhej edhe në ambientet e një kompanie private dhe shpërndahej në territorin e Beogradit.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)