Ndryshim historik: Hiqet rekomandimi për vaksinën kundër hepatitit B prej lindjes

Pikë kthese në politikat e vaksinimit në SHBA. Vendimi, pas një debati të gjatë, që zgjati rreth një ditë e gjysmë dhe u shoqërua nga përplasje të forta mes ekspertëve.

06.12.2025. 09:58 >> 15:32

Ndryshim historik: Hiqet rekomandimi për vaksinën kundër hepatitit B prej lindjes

Në Shtetet e Bashkuara është ndërmarrë një ndryshim i rëndësishëm në programin kombëtar të vaksinimit pediatrik. Komiteti i këshillimit rreth imunizimit për Qendrat e Kontrollit dhe Parandalimin e Sëmundjeve vendosi të shfuqizojë rekomandimin shumëvjeçar për administrimin e dozës së parë të vaksinës kundër “hepatitit B” brenda 24 orëve nga lindja.

Vendimi u mor pas një debati të gjatë, që zgjati rreth një ditë e gjysmë dhe u shënua nga përplasje të forta mes ekspertëve. Gjatë diskutimeve, përfaqësues të shëndetit publik bënë thirrje që rekomandimi të mbetej në fuqi, duke theksuar sigurinë dhe rëndësinë e vaksinimit të hershëm.

Por, ata u përballen me kundërshtitë e Komitetit, që aktualisht përbëhet kryesisht nga anëtarë skeptikë ndaj vaksinave, pasi anëtarët e mëparshëm u shkarkuan në muajin qershor. Me 8 vota pro dhe 3 kundër, Komiteti i këshillimit rreth imunizimit rekomandoi që gratë të cilat rezultojnë negative ndaj hepatitit B të kenë mundësinë të vendosin, në konsultim me mjekun, nëse foshnja duhet të vaksinohet menjëherë pas lindjes. Në rast se doza nuk jepet në lindje, sugjerohet që vaksina të shtyhet të paktën deri në moshën dy muajshe.

Foto: AP

Zakonisht, vaksina kundër hepatitit B administrohet në tre doza: e para brenda 24 orëve nga lindja, e dyta pas 1–2 muajsh dhe e treta nga 6 deri në 18 muaj. Disa anëtarë të komitetit shprehën shqetësime për vaksinimin në periudhën neonatale, duke e cilësuar atë si një fazë kritike për zhvillimin e trurit dhe të sistemit imunitar, pavarësisht faktit se kjo vaksinë përdoret në mënyrë të sigurt te të porsalindurit prej dekadash.

Sipas anëtarit të komisionit Restef Levi, i cili votoi pro ndryshimit, “kjo nuk është vetëm një çështje e një vaksine të vetme, por pjesë e një ndryshimi më të gjerë në strategjinë e përgjithshme të vaksinimit”. Nga ana tjetër, ekspertë të tjerë e kanë cilësuar vendimin si “të pamatur”, duke theksuar mungesën e të dhënave shkencore që justifikojnë shtyrjen e dozës së parë.

Shkarkoni aplikacionin Newsmax Balkans:

Etiketat:

Komente (0)