Pronari perfekt, iu jep 240 milionë dollarë punonjësve!

Graham Walker, ish-pronar i kompanisë Fibrebond në Luiziana, SHBA, ka dhuruar 240 milionë dollarë për 540 punonjësit e tij pas shitjes së biznesit familjar, sipas raportimeve të The Wall Street Journal. Çdo punonjës do të marrë pothuajse 500,000 dollarë, të shpërndara gjatë pesë viteve të ardhshme, me kusht që të qëndrojnë në kompani gjatë kësaj periudhe, përveç nëse kanë mbushur 65 vjeç.

Fibrebond prodhon kabina për pajisje elektrike dhe u ble nga kompania e menaxhimit të energjisë Eaton për 1.7 miliardë dollarë. Një zëdhënëse e Eaton tha se marrëveshja respekton angazhimet e kompanisë ndaj punonjësve dhe komunitetit lokal.

Walker deklaroi se shpërblimi ka ngritur moralin dhe ka sjellë përfitime për qytetin e Mindenit, me rreth 12,000 banorë. “Disa e shpenzuan menjëherë, por në fund vendimi është i tyre,” tha ai.

Punonjësit treguan se bonuset kanë ndryshuar jetën e tyre. Lesia Key, e cila ka nisur në Fibrebond në vitin 1995 me një pagë prej 5.35 dollarë në orë, përdori shpërblimin për të shlyer hipotekën e shtëpisë. “Tani mund të jetoj pa stres, jam mirënjohëse,” tha ajo. Ndërsa Hong Blackwell, 67 vjeçe, bleu një Toyota Tacoma për bashkëshortin dhe planifikon të udhëtojë. “Tani nuk kam më shqetësime, pensioni im është i sigurt,” tha ajo, shkruan Newsmax.

Kjo iniciativë është përshkruar si një shembull i jashtëzakonshëm i shpërblimit të punonjësve pas suksesit të një biznesi familjar.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)