Kërkoi të punonte nga shtëpia të kujdesej për prindërit, u shkarkua pas 25 vitesh, por fiton 165 mijë euro

Një gjykatë në Spanjë i ka dhënë të drejtë një punonjësi me mbi 25 vite eksperiencë në të njëjtën kompani, i cili u detyrua të largohej nga puna pasi kompania refuzoi vazhdimisht kërkesat e tij për përshtatjen e orarit, me qëllim që të kujdesej për prindërit e tij të moshuar dhe me aftësi të kufizuara.

Punonjësi, i punësuar që prej vitit 1997, kishte paraqitur tre herë kërkesë për ndryshimin e orarit të punës në vitet 2019, 2021 dhe 2022, por kompania i kishte refuzuar të gjitha. Si pasojë e presionit dhe situatës së krijuar, në fund të vitit 2020 ai përfitoi leje mjekësore për shkak të një çrregullimi adaptiv të shoqëruar me ankth, të shkaktuar nga kushtet e punës.

Duke u mbështetur në nenin 50 të Statutit të Punëtorëve, punonjësi vendosi të ndërpresë kontratën e punës, duke e konsideruar sjelljen e kompanisë si shkelje të rëndë të detyrimeve të saj. Fillimisht, Gjykata e Punës nr. 4 në Bilbao e rrëzoi padinë, duke argumentuar se nuk ekzistonte një shkelje mjaftueshëm serioze për të justifikuar ndërprerjen me të drejtë dëmshpërblimi.

Megjithatë, pas ankesës në Gjykatën e Lartë të Drejtësisë, vendimi ndryshoi. Kjo gjykatë vlerësoi se kompania nuk kishte marrë parasysh rrezikun psikosocial ndaj punonjësit dhe nuk kishte ndërmarrë masa për mbrojtjen e shëndetit të tij fizik dhe psikologjik. Si rrjedhojë, gjykata e shpalli të justifikuar largimin nga puna dhe e detyroi kompaninë të paguajë një dëmshpërblim prej 165.059 eurosh, si dhe t’i japë të drejtën për të përfituar pagesën e papunësisë, nëse plotëson kushtet ligjore.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)