Brenda mbretërisë së kripës 327 metra nën tokë me 245 kilometra tunele

E fshehur 327 metra nën tokë, pranë qytetit të Krakow, ndodhet një nga mrekullitë më të jashtëzakonshme nëntokësore të Europës, miniera e kripës Wieliczka. Me mbi 700 vite histori, kjo minierë kripe shtrihet në nëntë nivele dhe për dekada me radhë ka qenë burimi më i madh i kripës në Poloni.

Nxjerrja tradicionale e kripës përfundoi në vitin 1996, por sot miniera funksionon si një atraksion madhor turistik, duke tërhequr vizitorë nga e gjithë bota. Labirinti nëntokësor përfshin rreth 245 kilometra korridore dhe afro 150 milje tunele, megjithëse vetëm 2 për qind e territorit është i hapur për publikun.

Vizitorët mund të zgjedhin mes dy itinerareve, atij turistik ose “rrugës së minatorëve”. Rruga turistike u jep mundësinë të zbresin më shumë se 800 shkallë, të eksplorojnë dhoma të gdhendura në kripë, liqene të kripura dhe Kapelën e Shën Kingës, një hapësirë mahnitëse e skalitur plotësisht në kripë. Turi përfundon në nivelin e tretë, rreth 135 metra nën tokë.

Foto nga web

Ndërsa rruga e minatorëve ofron një eksperiencë më interaktive, ku vizitorët provojnë detyra tipike të punës në minierë dhe mësojnë mbi jetën e vështirë të minatorëve.

Miniera u përfshi në listën e parë të Trashëgimisë Botërore të UNESCO në vitin 1978 dhe konsiderohet një monument i paçmuar i kulturës materiale botërore. Brenda saj gjenden edhe shpella të rralla kristalesh haliti, forma më e pastër e kripës shkëmbore, të zbuluara në shekullin XIX.

Edhe sot, rreth 380 minatorë kujdesen për mirëmbajtjen e strukturës dhe mbrojtjen nga dëmtimet e ujit, duke ruajtur këtë mbretëri të jashtëzakonshme kripe për brezat e ardhshëm.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)