Celta Vigo befason Realin në “Bernabeu”, Barcelona shkëputet në krye

Në Madrid u regjistrua befasia e madhe e javës së15-të në La Liga-n spanjolle, ku Reali u thye 2-0 në “Santiago Bernabéu” nga Celta Vigo. Protagonist absolut ishte Williot Swedberg, autor i dy golave, ndërsa madrilenët e mbyllën ndeshjen me nëntë lojtarë pas kartonëve të kuq të Fran Garcias pas një ore lojë dhe Álvaro Carreras në kohën shtesë.

Real Madridi kishte kontrollin e lojës në pjesën e parë, por portieri Radu ishte vendimtar për miqtë, duke ndalur tentativat e Arda Güler, Bellingham dhe Vinicius Junior. Në pjesën e dytë, Celta shfrytëzoi kundërsulmet dhe në minutën e 54-t kaloi në avantazh me Swedberg, i cili realizoi me një devijim të bukur me thembër.

Situata u përkeqësua për vendasit kur Fran Garcia u ndëshkua me karton të kuq. Mundësitë e humbura nga Mbappé dhe Gonzalo Garcia nuk mjaftuan për të gjetur barazimin, teksa edhe aktivizimi i Rodrygos nuk solli ndryshim. Tensioni u rrit në minutat e fundit dhe Carreras doli nga fusha për protesta.

Në kohën shtesë, Swedberg shënoi sërish, pasi shmangu Courtois dhe e shtyu topin në rrjetë. Celta mund të kishte realizuar një tjetër gol, por në fund mori 3 pikë të çmuara që e ngrenë në kuotën e 19 pikëve. Kjo ishte fitorja e tyre e parë në 19 vjet, duke i dhënë fund pritjes me 22 ndeshje.

Real Madrid mbetet në kuotën e 36 pikëve. Me këtë humbje, Barcelona kryesuese ruan avantazhin prej katër pikësh ndaj rivalëve të përjetshëm. Në këtë situatë, trajneri Xabi Alonso është nën presion, pasi skuadra e tij rrezikohet të kalohet në renditje edhe nga Villarreal, që ka vetëm një pikë më pak dhe një ndeshje më tepër për të luajtur.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)