Roma drejt ëndrrës që zgjat 24 vite, mposht Comon në një mbrëmje të ftohtë

Roma ka arritur një fitore minimale, por tejet të vlefshme në garën për titullin kampion në Serie A, duke mposhtur Comon me rezultatin 1-0 dhe duke ruajtur rekordin perfekt të fitoreve këtë sezon sa herë që kalon e para në avantazh. Skuadra kryeqytetase mbetet kështu vetëm tre pikë larg kreut të renditjes, ku ndodhet Interi.

Në një mbrëmje të ftohtë dhe pa shumë shkëlqim në “Olimpico”, pjesa e parë ofroi pak emocione. Për 25 minutat e para loja ishte e zbehtë, pa raste të pastra shënimi. Roma nisi të shtonte presionin gradualisht, por hasi vështirësi për të çarë mbrojtjen e ngjeshur të Comos. Wesley França humbi një rast të mirë, duke goditur mbi traversë nga brenda zonës, ndërsa lëvizja më e bukur e ndeshjes erdhi në fund të pjesës së parë, kur krosimi i Wesley-t gjeti Evan Fergusonin, por goditja e irlandezit u ndal nga portieri Jean Butez.

Pjesa e dytë u karakterizua nga më shumë intensitet. Como u shfaq më agresive në sulm, ndërsa një gol i Bryan Cristante për Romën u anulua për pozicion jashtë loje. Goli vendimtar erdhi pas një aksioni të ndërtuar nga krahu i djathtë, ku Devyne Rensch përfitoi nga një dëmtim i Jayden Addai për të krosuar, ndërsa pas një devijimi të Matias Soule, topi përfundoi te Wesley, i cili shënoi me një goditje të saktë.

Edhe pse avantazhi ishte minimal, Roma e administroi mirë ndeshjen deri në fund. Como tregoi se ende nuk është në nivelin e ekipeve të mëdha, ndërsa verdhekuqtë vazhdojnë të mbeten seriozisht në garë për Scudetton e parë pas 24 vitesh.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)