Te Milani shfrenojnë fantazinë: Davide Bartesaghi si Maldini!

Anësori i Milanit, Davide Bartesaghi, ka përjetuar një mbrëmje të paharrueshme në Serie A, duke realizuar dy gola në fitoren ndaj Sassuolos, golat e tij të parë si profesionist në elitën e futbollit italian. Performanca e talentit kuqezi e ka vendosur atë në qendër të vëmendjes, jo vetëm për rezultatin, por edhe për pjekurinë që tregoi në fushë.

Pas ndeshjes, Bartesaghi foli për “Sport Mediaset”, ku theksoi se qasja e skuadrës mbetet e njëjtë pavarësisht kundërshtarit. Sipas tij, Milani hyn gjithmonë në fushë me synimin për të dhënë maksimumin dhe për të nderuar fanellën, edhe kur rezultati nuk vjen ashtu siç pritet. “Ne përpiqemi gjithmonë të hyjmë në ndeshje me të njëjtin mentalitet. Mund të fitosh ose jo, por e rëndësishme është të japësh gjithçka”, u shpreh ai.

I pyetur për emocionet pas dygolëshit, Bartesaghi e përshkroi momentin si të veçantë dhe të vështirë për t’u përkufizuar me fjalë. Ai theksoi se realizimi i golave të parë në Serie A ishte një ëndërr e bërë realitet, të cilën ia dedikoi familjes, miqve dhe stafit teknik që e ka mbështetur gjatë gjithë rrugëtimit të tij.

Në lidhje me krahasimet e hershme me legjendën Paolo Maldini, Bartesaghi u tregua i matur, duke theksuar se Maldini mbetet një idhull, por se krahasimet janë të nxituara. Ai nënvizoi se synimi i tij është të qëndrojë vetvetja dhe të japë maksimumin për Milanin. Anësori kuqezi zbuloi gjithashtu se është përgëzuar nga trajneri Allegri, duke e cilësuar dygolëshin përpara tifozëve si një moment gëzimi dhe krenarie.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)