Serie A: Juventusi mposht Romën dhe “sheh” zonën Champions

Juventusi fitoi 2-1 ndaj Romës në supersfidën e javës së 16-të të Serie A, duke u afruar vetëm një pikë larg vendit të katërt, që aktualisht mbahet pikërisht nga verdhekuqtë. Me nga një gol për pjesë, bardhezinjtë konfirmuan formën e mirë dhe ambiciet për zonën Champions.

Vendasit zhbllokuan ndeshjen në “Allianz Stadium” në fundin e pjesës së parë, me diagonalen e saktë të Conceição, që finalizoi një aksion mjaft të bukur të bardhezinjve nga e majta. Pjesa e dytë dhuroi më shumë emocione, me Juventusin që e nisi fuqishëm dhe dominoi lojën.

Në minutën e 70-të erdhi edhe goli i dytë: pas një goditjeje me kokë të McKennie të pritur nga Svilar, amerikani rikuperoi topin dhe asistoi për Openda, i cili realizoi golin e tij të parë në Serie A, duke dërguar topin në rrjetë me portën bosh. Roma reagoi dhe në minutën e 75-të Baldanzi ngushtoi diferencën, pork jo nuk mjaftoi.

Përkundrazi dhjetë minuta përpara fundit, shtylla i mohoi golin Yildiz. Pas fitores ndaj Bolognës dhe me këtë sukses kundër Romës, përforcohet bindja se Juventusi është rikthyer seriozisht në garën për një vend në Champions League. Ata favorizohen edhe nga kalendari, sepse me ndeshjet ndaj Pisa, Lecce dhe Sassuolo, skuadra e Spallettit ka një mundësi konkrete për ta mbyllur fazën e parë të Serie A mes katër ekipeve të para.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)