Incidentet e fundjavës, dënim shembullor për tifozët e Romës dhe Fiorentinës

Një dënim shembullor ka dhënë Ministria e Brendshme italiane për të frenuar dhunën e tifozëve në futboll.

Observatori Kombëtar për Manifestimet Sportive i Viminales ka vendosur ndalimin e plotë të transfertave për tifozët e Romës dhe Fiorentinës deri në fund të këtij sezoni.

Vendimi u mor pas incidenteve shumë të rënda që përfshinë dy tifozeritë, të cilat u përplasën në autostradë teksa ktheheshin nga transfertat respektive pas ndeshjeve Bologna–Fiorentina dhe Torino–Roma, duke rrezikuar seriozisht rendin publik dhe sigurinë e qytetarëve.

Në vendim përmenden edhe precedentët e shumtë të dhunshëm të tifozëve të të dyja skuadrave, si në Itali ashtu edhe jashtë vendit.

Ministri i Brendshëm Matteo Piantedosi theksoi se ky vendim përfaqëson një sinjal të fortë dhe të menjëhershëm për të ndërprerë fenomenin e përplasjeve të organizuara mes tifozëve, larg stadiumeve dhe pa lidhje direkte me ndeshjet.

Në të kaluarën, masa të ngjashme ishin marrë edhe ndaj tifoserive të Pisa dhe Veronës, të cilave u ishte ndaluar transferta për tre muaj. Megjithatë, ajo masë ishte pezulluar pas shenjave të pendesës konkrete nga tifozët. Këtë herë, qëndrimi i institucioneve është dukshëm më i ashpër.

Presidenti i Lega Serie A, Ezio Simonelli, ka mbështetur vendimin, duke e cilësuar dhunën në autostrada si shumë të rëndë dhe të papranueshme. Ai ka shprehur solidaritet me Policinë dhe ka theksuar se futbolli italian nuk mund të përzihet me sjellje kriminale që rrezikojnë jetën dhe sigurinë publike.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)