Barcelona, “manita” ndaj Sevilla-s, plus 4 nga Reali

Barcelona ka dhuruar një tjetër paraqitje spektakolare në kampionat, duke mposhtur me rezultatin 5-2 Sevillan dhe duke rikthyer diferencën prej katër pikësh në krye të La Liga.

Ylli i mbrëmjes ishte braziliani Raphinha, i cili realizoi një tregolësh dhe udhëhoqi Barcelonën drejt një fitoreje bindëse ndaj skuadrës andaluziane.

Ndeshja u zhbllokua në minutën e tetë, kur João Cancelo u rrëzua në zonë dhe gjyqtari akordoi penallti. Raphinha e shndërroi atë në gol me një goditje elegante “Panenka”, duke shënuar golin e tij të parë në kampionat që nga janari. Vetëm pak minuta më vonë, një tjetër penallti u akordua pas prekjes së topit me dorë nga José Ángel Carmona, dhe Raphinha realizoi sërish për 2-0.

Dominimi i katalanasve vazhdoi dhe në minutën e 30-të Dani Olmo shënoi golin e tretë pas një kundërsulmi të shpejtë. Sevilla arriti të ngushtojë diferencën në fundin e pjesës së parë falë një goli të Oso.

Në pjesën e dytë, Barcelona e vulosi fitoren kur Raphinha kompletoi tregolëshin pas një asistimi nga Fermín López. Më pas ishte radha e Cancelo-s të shënonte golin e pestë për vendasit.

Në minutat e fundit, Djibril Sow shënoi një gol ngushëllues për Sevillën. Me këtë sukses, Barcelona regjistroi fitoren e 15-të radhazi në shtëpi dhe vazhdon serinë e gjatë pa humbje ndaj Sevillës në fushën e saj.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)