SHBA shkëputet përfundimisht nga OBSH, administrata Trump mbyll kapitullin e bashkëpunimit

Shtetet e Bashkuara kanë përfunduar zyrtarisht tërheqjen nga Organizata Botërore e Shëndetësisë, duke finalizuar një objektiv të hershëm të presidentit të SHBA-së, Donald Trump.

Lajmi u konfirmua të enjten nga Departamenti i Shëndetësisë dhe Shërbimeve Njerëzore. Presidenti Trump kishte tentuar largimin nga OBSH edhe gjatë mandatit të parë, ndërsa në ditën e parë të mandatit të tij të dytë e formalizoi vendimin përmes një urdhri ekzekutiv.

Sipas rregullave, SHBA-të duhet të njoftonin organizatën një vit më parë dhe të shlyenin detyrimet financiare përpara daljes përfundimtare.

Aktualisht, SHBA-të i detyrohen OBSH-së rreth 260 milionë dollarë. Megjithatë, ekspertë të ligjit ndërkombëtar vlerësojnë se pagesa nuk ka gjasa të kryhet dhe se organizata ka pak mekanizma për ta detyruar Uashingtonin.

“Si çështje ligjore, është shumë e qartë se Shtetet e Bashkuara nuk mund të tërhiqen zyrtarisht nga OBSH-ja nëse nuk paguajnë detyrimet e papaguara, por OBSH-ja nuk ka fuqi ta detyrojë SHBA-në të paguajë”, tha Dr. Lawrence Gostin, ekspert i ligjit global të shëndetit në Universitetin Georgetown.

Të enjten, HHS njoftoi se të gjitha fondet amerikane për OBSH-në janë ndërprerë dhe se i gjithë personeli dhe kontraktorët e lidhur me organizatën janë tërhequr. Po ashtu, SHBA-të kanë pushuar pjesëmarrjen zyrtare në komitete, organe drejtuese dhe grupe teknike pune të OBSH-së.

Megjithatë, administrata la të hapur mundësinë e bashkëpunimeve të kufizuara. E pyetur për pjesëmarrjen në një takim të ardhshëm të OBSH-së lidhur me përbërjen e vaksinave të gripit për vitin e ardhshëm, administrata tha se diskutimet janë ende në vijim.

Gjatë një telefonate me gazetarët, një zyrtar i lartë i administratës u shpreh se SHBA-të “nuk kanë marrë kthimin e duhur për vlerën e parave dhe personelit që kanë dhënë”.

“Një premtim i bërë dhe një premtim i mbajtur”, tha zyrtari, duke shtuar se OBSH-ja “ka vepruar në kundërshtim me interesin e SHBA-së për të mbrojtur publikun amerikan”.

Edhe pse SHBA-të ishin financuesi më i madh i organizatës, administrata theksoi se OBSH-ja nuk ka pasur kurrë një drejtor të përgjithshëm amerikan.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)