Ra nga 300 metra lartësi, hetimet zbardhin ngjarjen që i mori jetën spanjollit

Një ngjarje tragjike ka ndodhur gjatë një fluturimi me një balonë me ajër në West Sussex në Angli, ku 33-vjeçari Jesus Lato Garzon humbi jetën pasi u hodh nga një lartësi rreth 300 metra. Ngjarja ndodhi më 19 shtator, gjatë një fluturimi panoramik të organizuar nga kompania Virgin, ku ndodheshin 16 pasagjerë të tjerë dhe piloti. 

Sipas dëshmive të paraqitura në seancën hetimore në Horsham, balona po fluturonte mbi zonën rurale të West Sussex-ut kur piloti u kërkoi të gjithëve të kthenin fytyrën nga kamera për një foto. Jesus buzëqeshi, përshëndeti, dhe në një moment të papritur u kap me duar në skajin e koshit të balonës, nxori këmbët jashtë dhe u hodh. Pasagjerët nuk patën asnjë mundësi të reagojnë. 

Trupi i tij u gjet disa orë më vonë në një fushë, ndërsa pranë tij u gjetën pasaporta, dokumentet e identifikimit dhe një shënim ku ai tregonte mënyrën se si dëshironte të trajtohej trupi i tij pas vdekjes. Hetimet zbuluan se ai nuk kishte pasur ndonjë problem me shëndetin mendor në të kaluarën. Testet toksikologjike rezultuan me gjurmë të një metaboliti joaktiv të kanabisit, i cili sipas hetuesve nuk mund të kishte ndikuar në gjendjen e tij. 

Asistentja e gjykatësit konfirmoi se veprimet e Garzon ishin të qëllimshme dhe përbënin vetëvrasje. Ajo shprehu ngushëllimet më të sinqerta për familjen dhe miqtë e tij, të cilët ndoqën seancën përmes një lidhjeje online. 

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)