"Putin po tallet", Von der Leyen ashpërson tonet: Sa më gjatë ta vazhdojë luftën, aq më e lartë kostoja për Rusinë

Teksa në Londër, Volodymyr Zelensky ka marrë mbështetjen e europianëve për Ukrainën gjatë një takimi me Starmer, Macron dhe Merz, Presidentja e Komisionit Evropian, Ursula von der Leyen, po ashtu ka njoftuar se mbështetja e Kievit dhe rritja e gatishmërisë së mbrojtjes evropiane janë përparësi kryesore për të ashtuquajturin “Koalicion i të Gatshmëve”, një grup vendesh që kërkojnë të ushtrojnë më shumë presion mbi Rusinë për t'i dhënë fund luftës.

Von der Leyen tha se kishte informuar Presidentin ukrainas Volodymyr Zelensky dhe udhëheqësit e tjerë të “Koalicionit të të Gatshmëve” mbi përparësitë e planit evropian. Ajo deklaroi ndër të tjera se propozimi për të përdorur asetet e ngrira ruse përmes një kredie dëmshpërblimi për Ukrainën është komplekse, por do të rriste koston e luftës për Moskën.

“Sa më gjatë që Putini të vazhdojë luftën e tij, duke derdhur gjak, duke marrë jetë dhe duke shkatërruar infrastrukturën ukrainase, aq më e lartë do të jetë kostoja për Rusinë”, tha Presidentja e KE-së.

Ajo shtoi se lidhjet brenda Evropës janë “më të forta se kurrë” dhe se “shtetet anëtare do të vazhdojnë të qëndrojnë së bashku, duke mbështetur Ukrainën dhe duke mbrojtur Evropën”.

Von der Leyen po ashtu shkroi në rrjetet sociale se Rusia po tallet me diplomacinë dhe përshkallëzon sulmet, duke pretenduar se kërkon paqe.

“Ndërsa Ukraina angazhohet në përpjekje të vërteta diplomatike për paqe, Rusia vazhdon të mashtrojë dhe të pengojë. Ajo tallet me diplomacinë dhe përshkallëzon sulmet, duke pretenduar se kërkon paqe. Sot, kjo fasadë mbetet fort në vend. Por ne nuk do të biem pre e saj. Ne e dimë kush është agresori dhe kush është viktima në këtë luftë”, shkroi Presidentja e Komisionit Ursula von der Leyen në ‘X’.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)