Rrëzohet avion ushtarak rus, ndërrojnë jetë të gjithë anëtarët e ekuipazhit

Shtatë persona kanë humbur jetën pas rrëzimit të një avioni transporti ushtarak rus An-22 gjatë një fluturimi mbi rajonin qendror të Ivanovos të martën pasdite, raporton media ruse Kommersant. 

Sipas Ministrisë Ruse të Mbrojtjes, avioni, që ka qenë në përdorim për mbi 50 vjet, ra mbi një zonë të pabanuar. Një komision special i Forcave Ajrore Ruse është ngritur për të hetuar shkaqet e aksidentit. Dëshmitarët okularë raportuan se avioni kishte filluar të “shkatërrohej” në ajër, dhe rrënojat ranë në rezervuarin Uvodye pranë fshatit Ivankovo. 

Kommersant raporton se An-22, i fundit i llojit të tij ende në përdorim në Rusi, ndoshta u rrëzua për shkak të një defekti teknik. Në bord ndodheshin pesë anëtarë të ekuipazhit dhe dy pasagjerë, të cilët konsiderohen të vdekur. 

Aviacioni rus ka përjetuar një krizë serioze që nga fillimi i pushtimit të Ukrainës, me një rritje prej 30% të incidenteve të sigurisë gjatë vitit 2024, për shkak të varësisë nga pjesë këmbimi dhe softuer të tregut të zi për shkak të sanksioneve ndërkombëtare, duke u detyruar shpesh të përdorin avionë të vjetër sovjetikë. 

Në një rast të ngjashëm, një An-24 i Angara Airlines u rrëzua në rajonin Amur në korrik, duke marrë jetën e të 43 personave në bord. 

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)