Për herë të parë nga Lufta e Ftohtë, Polonia nis prodhimin e minave kundër personit

Polonia ka vendosur të nisë prodhimin e minave kundër personelit për herë të parë që nga Lufta e Ftohtë, në kuadër të një strategjie të re mbrojtëse për forcimin e kufirit të saj lindor me Bjellorusinë dhe Rusinë. Lajmi u konfirmua nga zëvendësministri i Mbrojtjes, Pawel Zalewski, në një intervistë për Reuters, duke shënuar një ndryshim të rëndësishëm në politikën e sigurisë së Varshavës.

Minat do të jenë pjesë e programit të quajtur “Mburoja Lindore”, i cili synon të fortifikojë rreth 800 kilometra kufi, përfshirë zonën përreth enklavës ruse të Kaliningradit. Sipas Zalewskit, Polonia ka nevojë për sasi të mëdha minash sa më shpejt të jetë e mundur, ndërsa prodhimi pritet të nisë pas përfundimit të procesit të tërheqjes nga Konventa e Otavës, më 20 shkurt 2026.

Kompania shtetërore polake Belma, e cila tashmë furnizon ushtrinë me lloje të tjera municionesh, ka bërë të ditur se po përgatitet për një kërkesë që mund të arrijë në 5–6 milionë mina të të gjitha llojeve. Aktualisht, Belma prodhon rreth 100 mijë mina në vit, por kapaciteti mund të rritet deri në 1.2 milionë njësi në vitin e ardhshëm.

Autoritetet polake kanë theksuar se prioritet do të jenë nevojat e brendshme të sigurisë, por nuk e përjashtojnë mundësinë e eksportit të minave drejt Ukrainës. “Ukraina është një prioritet absolut, sepse siguria e Evropës dhe e Polonisë përcaktohet në frontin Rusi–Ukrainë”, u shpreh Zalewski.

Vendimi i Polonisë vjen në një kontekst më të gjerë rajonal, ku disa vende të Evropës Lindore dhe Veriore po rishqyrtojnë angazhimet e tyre ndaj traktatit ndërkombëtar që ndalon minat kundër personelit, për shkak të kërcënimeve në rritje nga Rusia.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)