Asetet ruse nuk preken, BE i siguron Ukrainës hua 90 miliardë euro

Bashkimi Europian arriti marrëveshjen për t’i dhënë Ukrainës një hua prej 90 miliardë eurosh për periudhën 2026–2027, e financuar përmes borxhit të përbashkët europian. Vendimi u mor pas disa orësh diskutimesh mes liderëve të BE-së dhe synon të mbulojë nevojat financiare të Kievit në vazhdim të luftës kundër Rusisë.

Presidentja e Komisionit Europian, Ursula von der Leyen, bëri të ditur se kjo zgjidhje ka marrë më shumë mbështetje sesa propozimi për përdorimin e drejtpërdrejtë të aseteve ruse të ngrira. Sipas marrëveshjes, këto asete nuk do të konfiskohen, por do të mbeten të bllokuara dhe mund të përdoren si garanci për shlyerjen e huasë.

BE po shqyrton gjithashtu dhënien e një huaje afatshkurtër, për të përballuar nevojat financiare të menjëhershme të Ukrainës, derisa të përcaktohet plotësisht kuadri ligjor për përdorimin e aseteve ruse. Për këtë hap kërkohet unanimiteti i 27 vendeve anëtare, i cili aktualisht konsiderohet i arritshëm.

Kancelari austriak Christian Stocker deklaroi se Unioni ka marrë parasysh “rreziqe të shumta” ligjore dhe financiare që lidhen me konfiskimin e aseteve ruse, duke shtuar se kompromisi i arritur lejon njëkohësisht mbështetjen e Ukrainës dhe ruajtjen e stabilitetit financiar europian. Lufta në Ukrainë po i afrohet ditës së 1,400 prej nisjes, ndërsa Bashkimi Europian vazhdon të kërkojë forma të qëndrueshme financimi për mbështetjen afatgjatë.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)