Helmim masiv në Moskë, 3 të vdekur e dhjetëra të tjerë të shtruar në spital

Të paktën tre persona kanë humbur jetën dhe mbi 40 të tjerë janë shtruar në spital pas një helmimi masiv të ndodhur në një bujtinë në periferi të Moskës. Ngjarja e rëndë është regjistruar në Vidnoye, një zonë rezidenciale pranë kryeqytetit rus, ku autoritetet kanë nisur menjëherë një hetim të gjerë penal për zbardhjen e plotë të rrethanave.

Sipas Komitetit Hetimor të Rusisë për Rajonin e Moskës, në momentin e incidentit në bujtinë ndodheshin gjithsej 73 persona. Nga këta, më shumë se 40 janë dërguar në spital në gjendje të ndryshme shëndetësore, ndërsa tre persona kanë ndërruar jetë. Autoritetet kanë paralajmëruar se bilanci i viktimave mund të rritet, për shkak të gjendjes së rëndë të disa të shtruarve.

Hetuesit dhe ekspertët e mjekësisë ligjore kanë inspektuar ambientet e bujtinës, kanë sekuestruar dokumentacionin përkatës dhe kanë marrë mostra ushqimore, enë kuzhine dhe materiale të tjera për analiza laboratorike. Paralelisht, përfaqësues të Rospotrebnadzor, institucioni përgjegjës për sigurinë ushqimore dhe mbrojtjen e konsumatorëve, kanë mbledhur mostra shtesë që do t’i nënshtrohen testimeve të detajuara.

Drejtuesi i bujtinës dhe disa nga klientët janë marrë në pyetje, ndërsa hetimet po fokusohen në përcaktimin e shkakut të helmimit dhe përgjegjësive të mundshme penale. Autoritetet kanë theksuar se po shqyrtohen të gjitha pistat, përfshirë sigurinë ushqimore dhe kushtet e shërbimit.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)