Ukraina humb një tjetër qytet, ndërsa banorët përballen me dimrin e ashpër e mungesën e energjisë elektrike

Forcat ukrainase janë tërhequr nga qyteti lindor i Siversk, në rajonin e Donetskut, ndërsa Rusia vijon avancimin e saj të ngadaltë, por të qëndrueshëm në lindje të Ukrainës. Ushtria ukrainase njoftoi të martën se tërheqja u bë “për të ruajtur jetën e ushtarëve dhe aftësinë luftarake të njësive”, duke pranuar se forcat ruse kishin një epërsi të konsiderueshme në numër.

Marrja e Siverskut i afron trupat ruse me qytetet strategjike Sloviansk dhe Kramatorsk, të konsideruara si pjesë e “brezit të fundit mbrojtës” që mbeten ende nën kontrollin e Ukrainës në Donbas. Para luftës, Siversk kishte rreth 11 mijë banorë, por qyteti është shkatërruar pothuajse tërësisht pas muajsh luftimesh intensive.

Rusia kontrollon aktualisht rreth 75% të rajonit të Donetskut dhe gati 99% të Luhanskut. Presidenti rus Vladimir Putin ka paralajmëruar vazhdimisht se forcat ukrainase duhet të tërhiqen nga i gjithë Donbasi, duke përjashtuar çdo kompromis territorial.

Ndërkohë, Ukraina u godit nga sulme masive ajrore gjatë natës. Sipas forcave ajrore ukrainase, Rusia lëshoi 635 dronë dhe 38 raketa, shumica e të cilave u neutralizuan. Megjithatë, të paktën tre persona humbën jetën, përfshirë një fëmijë, ndërsa dhjetëra të tjerë u plagosën në disa rajone të vendit.

Infrastruktura energjetike është goditur rëndë, me ndërprerje të gjera të energjisë elektrike. Autoritetet paralajmëruan për ndërprerje emergjente në të gjithë vendin, ndërsa temperaturat pritet të zbresin deri në -7 gradë celsius.

Presidenti Volodymyr Zelensky vijon të refuzojë çdo lëshim territorial, pavarësisht presionit ndërkombëtar, duke kërkuar garanci të forta sigurie për Ukrainën në çdo marrëveshje të mundshme paqeje.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)