Raketa balistike ruse rrezikoi të vriste ministrin europian, Kievi: Krime lufte!

Gjatë sulmit rus me raketën balistike “Oreshnik”, me rreze të mesme veprimi mbi rajonin e Lvivit, Moska rrezikoi të vriste një ministër të Bashkimit Europian. Në afërsi të zonës ku ndodhi sulmi, po udhëtonte Ministri i Jashtëm i Republikës Çeke, Petr Macinka.

Sipas mediave çeke, treni me të cilin udhëtonte ministri ishte rreth një orë larg qytetit të Lvivit. Kjo ishte vizita e tij e parë në Ukrainë. Gjatë takimit me krerët e shtetit në Kiev, Macinka konfirmoi vijimin e të ashtuquajturës “nismë çeke” në mbështetje të Ukrainës. Ai shprehu ngushëllimet e tij për viktimat e sulmeve ruse dhe theksoi se furnizimi me municione është thelbësor për mbrojtjen e vendit dhe për sigurinë e të gjithë Evropës.

Foto nga web

Sulmi rus me raketë hipersonike ndodhi fare pranë kufirit të Bashkimit Europian. Raketa goditi perëndimin e Ukrainës, rreth 80 kilometra nga kufiri me Poloninë. Pas njoftimit për sulmin me “Oreshnik”, komanda e Forcave të Armatosura polake I vendosi bazat ajrore dhe sistemet e mbrojtjes në alertë maksimale.

Autoritetet në Kiev e kanë cilësuar sulmin si një krim lufte. Shërbimi i Sigurisë së Brendshme të Ukrainës publikuan në Telegram pamje të fragmenteve të raketës së përdorur në sulmin ndaj rajonit të Lvivit. Sipas informacioneve paraprake, pjesët e gjetura i përkasin armës raketore “Oreshnik”. Mes fragmenteve janë identifikuar blloku i stabilizimit dhe i drejtimit – i konsideruar si “truri” i raketës – pjesë të motorit, fragmente të mekanizmit të orientimit dhe gryka e platformës së bllokut ndarës.

“Përdorimi i këtyre armëve kundër infrastrukturës civile të Ukrainës përbën një krim lufte nga ana e Federatës Ruse”, thuhet në deklaratën e Shërbimit të Sigurisë ukrainase.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)