Spanja bën goditjen e historisë, kapen 10 ton kokainë në det të hapur, droga e fshehur mes kripës

Policia spanjolle ka njoftuar sot se gati 10 ton kokainë u sekuestruan javën e kaluar nga një anije që transportonte kripë në Oqeanin Atlantik, në goditjen më të madhe të këtij lloji të bërë ndonjëherë nga shërbimet e tyre në det të hapur.

Operacioni u krye nga njësitë speciale të policisë spanjolle, të cilat kapën anijen e mallrave me flamur të Kamerunit, të lidhur me një organizatë shumëkombëshe të trafikimit të drogës ndërsa ajo lundronte në Oqeanin Atlantik.

“Anija ishte nisur nga Brazili dhe kishte për destinacion Evropën. Trembëdhjetë persona u arrestuan gjatë operacionit dhe droga, 9,994 kilogramë e ndarë në 294 çanta, u sekuestrua, si dhe një revolve”, tha policia në një deklaratë.

DEA e SHBA-së, agjencia federale përgjegjëse për luftimin e trafikut të drogës, si dhe autoritetet franceze, portugeze dhe braziliane bashkëpunuan për suksesin e operacionit.

Ky megaoperacion i policisë spanjolle në det të hapur vjen tre muaj pas një të ngjashmi, në tetor 2025, kur njoftuan sekuestrimin e 6.5 ton kokainë në një anije pranë Ishujve Kanarie.

Spanja konsiderohet nga ekspertët si një nga portat kryesore për hyrjen e kokainës në Evropë, për shkak të lidhjeve të saj me Amerikën Latine, ku prodhohet droga, dhe vendndodhjes së saj gjeografike.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)