"Larg duart nga Groenlanda", protesta masive në Danimarkë kundër planeve të Trump për ishullin Arktik

Mijëra njerëz janë mbledhur në rrugët e qyteteve në Danimarkë dhe Groenlandë, duke protestuar kundër planeve të Donald Trump për të marrë kontrollin e ishullit më të madh në Arktik.

Që nga mëngjesi, marshime dhe tubime masive kanë ndodhur kundër planeve të SHBA-ve, që danezët dhe banorët e Groenlandës i konsiderojnë të paligjshme.

Siç raportojnë mediat daneze protestuesit brohoritën "Jankees shkoni në shtëpi!" dhe emrin e Groenlandës në gjuhën vendase "Kalaallit Nunaat!", duke dërguar një mesazh të unifikuar respekti për demokracinë e Groenlandës dhe të drejtat themelore të njeriut.

Në Kopenhagen, tubimi ishte planifikuar për në orën 12:00 të mesditës, me demonstratën që u zhvendos drejt ambasadës amerikane. Tubime paralele ishin planifikuar në qytetet daneze Aarhus, Aalborg dhe Odense.

Ndërkohë në Nuuk, kryeqytetin e Groenlandës protestuesit do të marshojnë drejt konsullatës amerikane. Të paktën 900 persona kanë shprehur qëllimin e tyre për të marrë pjesë nëpërmjet Facebook-ut në një zonë me një popullsi totale prej rreth 57,000 banorësh.

Tensionet kanë qenë të larta në dy muajt e fundit, pasi Presidenti amerikan Donald Trump ka përsëritur dëshirën e tij që SHBA-të të marrin kontrollin e ishullit. Dje, lideri i “Shtëpisë së Bardhë” paralajmëroi se mund të vendosë tarifa për vendet që kundërshtojnë planet e tij për Groenlandën, e cila është një territor gjysmë-autonom nën Mbretërinë e Danimarkës.

Në të njëjtën kohë, banorët duket se nuk pajtohen me planet e Uashingtonit, pasi një sondazh i ri tregon se 85% e banorëve të Groenlandës nuk duan që ishulli Arktik të jetë pjesë e SHBA-së.

Protestat vijnë në një kohë kur një delegacion dypartiak i kongresmenëve ndodhet në Kopenhagen për një vizitë dy-ditore për të shprehur mbështetje për Danimarkën dhe Groenlandën. Delegacioni thotë se populli amerikan nuk i ndan ambiciet territoriale të presidentit amerikan.

Në të njëjtën kohë, zyrtarët evropianë kanë shprehur mbështetjen e tyre për Groenlandën përmes një misioni ushtarak zbulimi që përfshin zyrtarë nga disa vende, që ka mbërritur në ishull dhe po patrullon ujërat përreth.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)