“NATO qëndroi larg vijës së frontit në Afganistan”, britanikët të zemëruar me deklaratën e Trump

Presidenti i SHBA-ve, Donald Trump, ka shkaktuar zemërim midis deputetëve britanikë dhe veteranëve të luftës me deklaratën e bërë nga Davosi, ku tha se trupat e NATO-s kanë qëndruar larg vijave të frontit në Afganistan.

Në një intervistë për Fox News, teksa përsëriti pikëpamjen e tij se NATO nuk do t'i mbështeste Shtetet e Bashkuara nëse do t’u kërkohej ndihmë, Trump po ashtu provokoi me pohimin për luftën në Afganistan.

"Ne kurrë nuk kishim nevojë për ta. Ata thanë se do të dërgonin disa trupa në Afganistan dhe e bënë, qëndruan pak prapa, pak larg vijave të frontit", u shpreh Presidenti i SHBA-ve.

Vërejtjet e tij u dënuan nga i gjithë spektri politik në Londër, me kritikët që theksuan se 457 britanikë janë vrarë në Afganistan. Nga Britania e Madhe po ashtu i kujtuan Trump faktin se ai ka shmangur shërbimin ushtarak në Vietnam.

Calvin Bailey, një deputet i Partisë Laburiste dhe ish-oficer i RAF-it që shërbeu me njësitë e operacioneve speciale amerikane në Afganistan, i tha mediave se pretendimi i Trump "nuk ka asnjë lidhje me realitetin e përjetuar nga ata prej nesh që shërbyen atje".

Edhe deputeti konservator Ben Obsi-Jekti, i cili shërbeu në Afganistan si kapiten në Regjimentin Mbretëror të Yorkshire, tha se ishte "e trishtueshme të shihje sakrificën e kombit dhe atë të partnerëve të NATO-s të shitur kaq lirë nga presidenti i Shteteve të Bashkuara".

Kryetari i Komitetit të Përzgjedhur të Mbrojtjes të Dhomës së Komunëve, Tan Dezey, tha se komentet e presidentit ishin "të tmerrshme dhe një fyerje për ushtarakët dhe gratë e guximshme britanike që rrezikuan jetën dhe gjymtyrët e tyre për të ndihmuar aleatët, shumë prej të cilëve bënë sakrificën përfundimtare".

Kryetarja e Komitetit të Punëve të Jashtme, Emily Thornberry tha gjithashtu se komentet e Trump ishin "shumë më shumë sesa një gabim dhe një fyerje për familjet e të vrarëve”.

Ish-ushtari, autori dhe gazetari Stephen Stewart tha po ashtu se "komentet e Trump janë si ofenduese ashtu edhe të pasakta”.

“Është një ironi e madhe që dikush që dyshohet se shmangu ushtrinë në Luftën e Vietnamit duhet të bëjë një deklaratë kaq të turpshme. Ai ka përdhosur kujtimin e qindra ushtarëve britanikë që bënë sakrificën përfundimtare në Afganistan, njerëz që ne i quajmë miq dhe shokë. Nëse ai do të ishte një njeri i ndershëm, ai do të gjunjëzohej dhe do t'u kërkonte falje familjeve të të rënëve”, u shpreh ai duke nxitur po ashtu provokime.

Dhe udhëheqësi i Demokratëve Liberalë, Ed Davey, shkroi në një postim në X se “Trump ka shmangur shërbimin në ushtri 5 herë”. “Si guxon ai të vërë në dyshim sakrificën e tyre. Farage dhe të gjithë të tjerët që vazhdojnë ta lajkatojnë Trumpin duhet të turpërohen”, theksoi ai.

Mbretëria e Bashkuar ka pasur numrin e dytë më të lartë të vdekjeve ushtarake në konfliktin në Afganistan, pas SHBA-së, e cila kishte 2,461. Aleatët e Amerikës kanë humbur 1,160 trupa ushtarake në konflikt, rreth një e treta e të gjitha vdekjeve të koalicionit.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)