Macron kërkon ndalimin e rrjeteve sociale për fëmijët nën 15 vjeç

Franca po mendon të kufizojë rrjetet sociale për fëmijët, duke ndjekur shembullin e Australisë. Në Asamblenë Kombëtare është hapur debati mbi ligjin e ri që synon të mbrojë shëndetin mendor dhe emocional të të rinjve.

Projektligji parashikon ndalimin e aksesit për fëmijët nën 15 vjeç në rrjete sociale si Snapchat, Instagram dhe TikTok. Ai mbështetet dhe nga Presidenti Emmanuel Macron i cili ka theksuar se dëshiron që ligji të hyjë në fuqi deri në fillim të vitit shkollor të ardhshëm, në muajin shtator.

Sipas tekstit të propozuar, rregullatori shtetëror i medias do të hartojë një listë të rrjeteve të cilat konsiderohen të dëmshme dhe do të ndalohen për fëmijët nën 15 vjeç. Një listë e veçantë e rrjeteve “më pak të dëmshme” do të jetë e arritshme vetëm me miratimin e prindërve.

Projektligji parashikon gjithashtu ndalimin e përdorimit të telefonave celularë në shkollat e mesme, një masë që tashmë zbatohet në institucione të ndryshme arsimore.

Ligji ka shanse të larta miratimi, pasi partitë pro-Macron pritet t’u bashkohen republikanët e qendrës së djathtë dhe Tubimi Kombëtar. Nëse miratohet nga Asambleja Kombëtare, ai do të kalojë më pas në Senat, dhe qeveria synon të përdorë një procedurë të përshpejtuar për të zbatuar ligjin deri në shtator.

Ky projektligj është pjesë e një tendence globale për kufizimin e rrjeteve sociale për të rinjtë, me vende të tjera si Danimarka, Greqia, Spanja, Irlanda dhe Mbretëria e Bashkuar që shqyrtojnë masa të ngjashme.

Ai bazohet në një tekst të deputetes Laure Miller, e cila kryesoi një komision parlamentar mbi efektet psikologjike të TikTok dhe rrjeteve të tjera. Macron e ka bërë këtë çështje një nga prioritetet e tij për vitin e fundit të mandatit, duke synuar mbrojtjen e fëmijëve dhe fitimin e favorizimit të publikut.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)