Vendi më i sigurt në botë që nuk ka asnjë ushtar... pjesë e NATO-s

Ndërsa lufta në Ukrainë po i afrohet vitit të katërt, fokusi i tensioneve gjeopolitike është zhvendosur së fundmi drejt Groenlandës, pas deklaratave të presidentit të SHBA-së, Donald Trump, i cili ka pohuar se synon ta marrë ishullin “me çdo mjet”, qoftë përmes blerjes apo edhe forcës ushtarake. Këto deklarata kanë shkaktuar shqetësim brenda NATO-s, pasi Groenlanda është territor i Danimarkës, një nga vendet anëtare dhe themeluese të Aleancës.

Sipas nenit 5 të NATO-s, një sulm ndaj një vendi anëtar konsiderohet sulm ndaj të gjithëve, duke detyruar reagim kolektiv. Megjithatë, një nga vendet themeluese të NATO-s ndodhet në një pozicion të veçantë, Islanda, e cila nuk ka ushtri.

Me mbi 400 mijë banorë dhe një sipërfaqe prej rreth 103 mijë kilometrash katrorë, Islanda është ishulli i dytë më i madh në Evropë pas Mbretërisë së Bashkuar. Që nga viti 1869, pas një historie të gjatë nën Norvegjinë dhe Danimarkën, vendi vendosi të shpërbëjë forcat e tij të armatosura, duke ndjekur një kulturë paqësore.

Sot, Islanda disponon vetëm një roje bregdetare, një polici të paarmatosur dhe një njësi speciale të kufizuar, të pamjaftueshme për t’u përballur me një agresion ushtarak. Megjithatë, siguria e saj garantohet përmes marrëveshjeve bilaterale, kryesisht me Shtetet e Bashkuara. SHBA mbajti një bazë ushtarake në Reykjavik pas Luftës së Dytë Botërore dhe mbetet aktori kryesor në mbrojtjen e vendit.

Pavarësisht mungesës së ushtrisë, Islanda renditet si vendi më i sigurt në botë sipas OECD-së, falë standardit të lartë të jetesës dhe nivelit shumë të ulët të kriminalitetit.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)