Shpërthen në flakë rafineria më e madhe e naftës në Turqi, dëmet kolosale

Një shpërthim i fuqishëm në rafinerinë më të madhe të naftës në Turqi shkaktoi një zjarr të madh të enjten në mbrëmje në provincën Kocaeli, duke detyruar evakuimin e menjëhershëm të të gjithë punëtorëve. Incidenti ndodhi në një rezervuar benzine në rafinerinë TUPRAS Izmit, një nga objektet industriale më strategjike të vendit.

Sipas autoriteteve, shpërthimi ndodhi në orët e mbrëmjes dhe flakët u përhapën me shpejtësi në kompleksin e rafinerisë, duke shkaktuar panik.

Ekipet e emergjencës dhe zjarrfikësit ndërhynë menjëherë dhe po punonin ende për të vënë nën kontroll zjarrin deri në orët e vona të natës. Deri tani nuk ka informacione zyrtare për viktima apo përmasat e dëmeve materiale, ndërsa shkaku i shpërthimit mbetet i paqartë.

Rafineria e Izmitit është një nga katër rafineritë e operuara nga Turkiye Petrol Rafinerileri AS dhe ka një kapacitet përpunimi prej 11 milionë ton naftë bruto në vit. Ajo përbën shtyllën kryesore të sektorit të rafinimit në Turqi, duke përpunuar naftë të importuar nga tregjet ndërkombëtare.

E vendosur në Turqinë veriperëndimore, rafineria punëson rreth 1,900 persona dhe ka një kapacitet magazinimi mbi 3 milionë tonë. Në funksion që nga viti 1961, ajo konsiderohet objekti më kompleks dhe më i sofistikuar i TUPRAS, me rëndësi kyçe për sigurinë energjetike të vendit.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)