E pazakontë, pasagjeri ngjitet mbi avion në Valencia

Një incident i pazakontë ka shkaktuar kaos dhe vonesa të gjata në aeroportin Manises të Valencias në Spanjë, pasi një burrë u ngjit mbi një avion pasagjerësh. Burri, i raportuar si një 24-vjeçar me origjinë marokene, u pa duke vrapuar mbi një avion Vueling Airbus A320, ndërsa fluturimi ishte planifikuar të nisej drejt Amsterdamit.

Pamjet e filmuara nga pasagjerët tregojnë të riun duke bërtitur, duke prekur gjoksin dhe duke kërcyer mbi çatinë e avionit, ndërsa stafi përpiqej ta bindte të zbriste. Ai madje nxori një pije nga çanta dhe e piu mbi avion, duke injoruar thirrjet e punonjësve. Sjellja e tij zgjati rreth 10 minuta dhe shkaktoi një vonesë prej dy orësh për fluturimin.

Në vendngjarje u thirrën oficerë të Gardës Civile, të cilët arritën ta bindnin burrin të zbriste. Autoritetet konfirmuan se ai nuk kishte armë dhe se nuk përbënte rrezik për sigurinë e pasagjerëve. Gjithashtu, u kërkua ndihmë mjekësore.

Foto: X

Avioni iu nënshtrua një kontrolli të detajuar teknik, por nuk u konstatuan dëmtime. Incidenti vjen vetëm pak ditë pas një ngjarjeje tjetër të rëndë në një fluturim Air Asia në Azi, ku një pasagjer i dehur u zhvesh, kërcënoi ekuipazhin dhe tentoi të hidhej nga avioni.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)