Nuk kishin ku të faleshin për Ramazan, kisha i hap dyert myslimanëve

Në një gjest solidariteti dhe bashkëjetese fetare, Kisha Katolike në qytetin e vogël italian të Monfalcone-s ka vendosur të vërë në dispozicion disa ambiente për komunitetin mysliman lokal, i cili kishte mbetur pa hapësira për ushtrimin e riteve fetare gjatë muajit të Ramazanit. Ngjarja ka ndodhur në rajonin e Friuli-Venezia Giulia, pranë Gjirit të Triestes.

Nisma është ndërmarrë nga famullitarët e zonës, monsinjor Paolo Zuttion dhe don Zanetti, në koordinim me ipeshkvin e Gorizia-s, Carlo Roberto Maria Redaelli. Komuniteti mysliman do të mund të përdorë ambientet e “Stalle Rosse” në komunën fqinje Staranzano, si edhe oratorin San Michele në Monfalcone, sipas një kalendari të përcaktuar për të respektuar nevojat e të dy komuniteteve fetare.

Don Zanetti theksoi se është e rëndësishme të kapërcehen frikat dhe paragjykimet, duke vënë në dukje se periudha e Kreshmës katolike përkon pjesërisht me agjërimin mysliman të Ramazanit. “Të gjithë kanë të drejtë të luten dhe të praktikojnë fenë e tyre sipas përvojës personale, pa hyrë në polemika”, është qëndrimi i përbashkët i dy famullitarëve.

Foto ilustruese

Presidenti i qendrës islame “Baitus Salat”, Rejaul Haq Raju, falënderoi “vëllezërit katolikë” për gatishmërinë e treguar. Ai theksoi se komuniteti mysliman ka respektuar gjithmonë rregullat dhe bashkëjetesën në qytet.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)