Shpërthim pranë sinagogës në Liège, autoritetet belge: Akt antisemit

Një shpërthim i fuqishëm ka dëmtuar një sinagogë në qytetin belg  të Liège në orët e para të mëngjesit të së hënës, duke shkaktuar dëme materiale, por pa lëndime në njerëz.

Ngjarja ndodhi rreth orës 04:00 të mëngjesit përpara objektit të shenjtë dhe theu dritare edhe në ndërtesat përballë.

Kryetari i bashkisë, Willy Demeyer, e cilësoi incidentin si një “akt antisemit”. Ndërkohë kryeministri belg Bart De Wever deklaroi në rrjetet sociale se qeveria qëndron në solidaritet me komunitetin hebre. Hetimet po drejtohen nga prokuroria federale belge, e cila merret me çështjet e terrorizmit dhe krimit të organizuar.

Policia vendosi menjëherë një kordon sigurie rreth zonës dhe rruga u mbyll ndërsa hetuesit nisën punën në vendngjarje. Banorë të zonës thanë se shpërthimi ishte i fortë dhe fillimisht menduan se bëhej fjalë për një rrjedhje gazi.

Ministri i Brendshëm Bernard Quintin e dënoi sulmin, duke e quajtur një “akt të neveritshëm antisemit” që synon drejtpërdrejt komunitetin hebre në Belgjikë. Autoritetet theksuan se masat e sigurisë rreth objekteve hebreje janë rritur kohët e fundit për shkak të tensioneve ndërkombëtare.

Sinagoga e Liège, e ndërtuar në vitin 1899, shërben gjithashtu si muze i historisë së komunitetit hebre të qytetit. Në Belgjikë jetojnë rreth 42 mijë hebrenj, kryesisht në Bruksel dhe Antwerp.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)