I moshuari shqiptar shkoi të vidhte manaferra dhe vdiq në pus, 6 muaj burg pronarit italian të tokës

Një 77-vjeçar me origjinë shqiptare humbi jetën pasi ra në një pus, teksa kishte hyrë në një pronë private për të mbledhur manaferra në Tuoro sul Trasimeno, në provincën e Perugias. Ngjarja ndodhi në vitin 2017 në Itali, ndërsa pas procesit gjyqësor që zgjati tetë vite, Gjykata e Apelit dënoi bashkëpronarin e tokës me gjashtë muaj burg për vrasje nga pakujdesia.

Sipas gjykatës, pronari nuk kishte marrë masat e nevojshme për sigurinë e pusit të vjetër, i cili ishte i pambrojtur dhe i mbuluar nga bimësia. Gjykata vlerësoi se pusi nuk kishte mbrojtje apo mbulesë dhe për këtë arsye përbënte rrezik. Argumentet e mbrojtjes, sipas të cilave viktima kishte hyrë në tokë pa dijeninë e pronarëve dhe se prona ishte e rrethuar, u hodhën poshtë nga gjyqtarët, të cilët theksuan se rrethimi ishte i dobët dhe lehtësisht i kalueshëm.

Trupi i 77-vjeçarit u gjet në një pus rreth tre metra të thellë dhe rreth një metër e gjysmë në diametër, i mbuluar nga shkurre. Ai u zbulua nga një qen i zjarrfikësve pas një nate kërkimesh, të nisura pasi familjarët njoftuan autoritetet për zhdukjen e tij. Burri ishte larguar nga shtëpia rreth orës 19:00 dhe kur nuk u kthye deri në mesnatë, familja kërkoi ndihmën e karabinierëve.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)