15 dënime përjetë për sulmin terrorist në sallën e koncerteve në Rusi

Një gjykatë ushtarake në Rusi ka dënuar me burgim të përjetshëm 15 persona për sulmin terrorist në sallën e koncerteve “Crocus City Concert Hall”, një nga ngjarjet më të përgjakshme në vend në dy dekadat e fundit.

Në total, 19 persona u shpallën fajtorë për sulmin e 22 marsit 2024, i cili la të paktën 149 të vdekur dhe mbi 500 të plagosur pranë Moskës.

Sipas mediave shtetërore, katër personat që kryen drejtpërdrejt sulmin u dënuan me burgim të përjetshëm, së bashku me 11 bashkëpunëtorë të tjerë që akuzohen se i ndihmuan me para, armë dhe lidhje me grupe terroriste.

Katër të pandehur të tjerë morën dënime nga 19 deri në 22 vjet burg për ndihmë logjistike, përfshirë shitjen e një makine dhe sigurimin e një apartamenti për autorët.

Sulmi ndodhi gjatë një koncerti rock në qytetin Krasnogorsk, kur rreth 6 mijë persona ndodheshin në sallë. Sulmuesit hapën zjarr ndaj turmës dhe më pas i vunë flakën godinës, duke shkaktuar një zjarr të madh që çoi edhe në shembjen e çatisë. Shumë viktima humbën jetën nga plumbat, ndërsa të tjerë nga asfiksia për shkak të tymit.

Autoritetet konfirmuan se katër sulmuesit kryesorë ishin shtetas të Taxhikistanit. Përgjegjësinë për sulmin e mori një degë e grupit ekstremist Shteti Islamik, e njohur si IS-K.

Megjithatë, autoritetet ruse kanë vazhduar të akuzojnë Ukrainën për përfshirje të mundshme, pretendim që është mohuar kategorikisht nga Kievi dhe për të cilin nuk janë paraqitur prova publike. Gjykimi u zhvillua me dyer të mbyllura dhe ende nuk dihet nëse të dënuarit do të apelojnë vendimin.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)