Emiratet mbyllin rafinerinë e naftës më të madhe në botë, Irani - Amerikës: Agresorët ikin e vijnë, ne 6000 vite këtu

Teksa i afrohemi dy javëve luftë në Lindjen e Mesme, ka një panormaë më të qartë të bashkimit të forcave nga Bashkimi Europian për t’iu përgjigjur ngërçit të krijuar me tregtinë globale dhe çmimet e karburantit pas bllokimit të Ngushticës së Hormuzit.

Amerika paralajmëroi Iranin se e sotmja do të jetë dita e sulmit më shkatërrimtare në këtë konflikt, ndërsa Starmer, Merz dhe Meloni kanë rënë dakord për bashkëpunim të ngushtë në sigurinë e lundrimit në Hormuz.

Kryeministri i Mbretërisë së Bashkuar, Keir Starmer, foli në telefon me kancelarin gjerman Friedrich Merz dhe kryeministren italiane Giorgia Meloni të hënën në mbrëmje për të diskutuar zhvillimet në Lindjen e Mesme. Një zëdhënës i Downing Street tha se të tre udhëheqësit diskutuan tensionet në rritje në rajon dhe theksuan rëndësinë e sigurimit të lirisë së lundrimit për anijet tregtare nëpër zonë.

Udhëheqësit ranë dakord të "punojnë ngushtë së bashku" në ditët në vijim për t'iu kundërvënë kërcënimeve nga Irani dhe për të ruajtur sigurinë e transportit detar. Gjatë telefonatës, Starmer i informoi homologët e tij mbi masat e fundit mbrojtëse të Mbretërisë së Bashkuar në rajon në mbështetje të aleatëve të saj të Gjirit.

Të tre udhëheqësit theksuan gjithashtu nevojën për bashkëpunim të vazhdueshëm të ngushtë midis vendeve të tyre në dritën e përshkallëzimit të situatës dhe ranë dakord të qëndrojnë në komunikim të vazhdueshëm në ditët në vijim.

Paralelisht, qeveria britanike është në kontakt me sektorin e sigurimeve për të siguruar mbulimin e nevojshëm për bizneset e transportit detar.

Sakaq, Emiratet e Bashkuara Arabe mbyllën sot rafinerinë më të madhe të naftës në rajon pas sulmit me drone nga Irani.

Bloomberg raportoi se sulmi shkaktoi një zjarr në objektin, i cili mund të përpunojë 922,000 fuçi në ditë, nërsa zyra e shtypit e Abu Dhabit tha se nuk pati të lënduar në sulm.

Në krahun tjetër Teherani iu përgjigj zhvillimeve në frontin perëndimor me një mesazh të postuar në rrjetet sociale nga Presidenti Masoud Pezeshkian, i cili theksoi historinë e gjatë të vendit dhe rezistencën e tij ndaj sulmeve të jashtme, duke thënë se Irani ka mbijetuar konflikteve dhe presioneve të përsëritura gjatë shekujve.

"Irani është trashëgimtar i një qytetërimi që është të paktën 6,000 vjeçar. Përmes sprovave të historisë, asnjë fuqi nuk ka arritur ndonjëherë ta fshijë këtë emër historik. Kushdo që ushqen iluzionin se mund ta shkatërrojë Iranin nuk di asgjë për historinë. Agresorët kanë ardhur dhe kanë ikur, por Irani ka duruar", shkroi ai.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)