“Nuk është koha për të fjetur në timon. Kërcënimi i Iranit për Britaninë është real”

Qoftë një episod i vetëm dramatik apo një paralajmërim për atë që mund të vijë, lëshimi i dy raketave me rreze të gjatë nga Irani drejt Diego Garcia, territor britanik në Oqeanin Indian, duhet të kishte shërbyer si një sinjal alarmi për qeverinë britanike.

Në vend të kësaj, ministri britanik i Strehimit, Steve Reed, dhe jo një zyrtar i mbrojtjes, doli me deklarata qetësuese, duke thënë se Irani nuk ka raketa që mund të arrijnë Londrën dhe se Britania është e mbrojtur. Sipas Mark Almond, drejtor i Institutit të Kërkimeve të Krizave në Oksford, këto pretendime janë të gabuara.

Ai thekson se raketat iraniane Khorramshahr, që më parë mendohej se kishin rreze deri në 2 mijë kilometra, mund të kenë arritur tashmë deri në 4 mijë kilometra, duke e vendosur Londrën në kufijtë e rrezikut. Këto raketa, të bazuara në teknologji koreano-veriore, mund të përgatiten për lëshim brenda pak minutash, çka i bën të vështira për t’u neutralizuar.

Sipas tij, Irani nuk mbështetet vetëm te këto raketa, por edhe te sisteme të tjera që mund të përshtaten për përdorim ushtarak. Edhe pse Izraeli ka paralajmëruar shpesh për kërcënimin iranian, zhvillimet e fundit tregojnë se kapacitetet balistike të Teheranit janë reale dhe në rritje.

Almond paralajmëron se, megjithëse sulmet e fundit kanë dëmtuar një pjesë të arsenalit iranian, kërcënimi nuk është eliminuar. Ai kujton se edhe gjatë Luftës së Dytë Botërore, pavarësisht bombardimeve intensive, Gjermania arriti të prodhonte raketa që goditën Londrën.

Një tjetër shqetësim i madh është mungesa e mbrojtjes së drejtpërdrejtë raketore në Britani. Sipas tij, vendi do të ishte i varur nga sistemet amerikane të vendosura në Evropë në rast të një sulmi.

Në përfundim, Almond thekson se publiku meriton transparencë dhe jo deklarata të paqarta. Sipas tij, kërcënimi nga Irani dhe nga aktorë të tjerë globalë si Kina dhe Rusia mbetet real, dhe nuk është koha për neglizhencë.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)