Përmbytje shkatërruese në Azi: mbi 880 viktima në Indonezi

Bilanci i viktimave nga shirat e rrëmbyeshëm dhe rrëshqitjet e dheut në Azi Juglindore vazhdon të rritet. Në Indonezi, përmbytjet dhe rrëshqitjet e tokës që kanë goditur ishullin e Sumatrës kanë shkaktuar të paktën 883 viktima, ndërsa 520 persona rezultojnë ende të zhdukur. Lajmi është konfirmuar nga Agjencia Kombëtare për Menaxhimin e Fatkeqësive, e cila raporton gjithashtu rreth 4.200 të plagosur.

Foto: AP

Provincat më të prekura janë Aceh, Sumatra Veriore dhe Sumatra Perëndimore, ku reshjet intensive kanë zgjatur për disa ditë me radhë. Aceh është zona më e goditur, me 345 viktima dhe 174 të zhdukur. Autoritetet paralajmërojnë se bilanci mbetet ende provizor, pasi operacionet e shpëtimit po pengohen nga ura të dëmtuara dhe rrugë të bllokuara.

Situata është tragjike edhe në Sri Lanka, ku pas kalimit të ciklonit Ditëah javën e kaluar, numri i të vdekurve nga përmbytjet dhe rrëshqitjet e dheut ka arritur në 607, ndërsa 214 persona vazhdojnë të jenë të zhdukur. Sipas Qendrës për Menaxhimin e Fatkeqësive, mbi 2 milionë njerëz janë prekur nga kjo katastrofë natyrore, e konsideruar ndër më vdekjeprurë në vend që nga cunami i vitit 2004.

Reshjet e dendura kanë shkaktuar dëme të mëdha edhe në vende të tjera të rajonit, përfshirë Tajlandën dhe Malajzinë, ndërsa autoritetet lokale dhe organizatat humanitare po vazhdojnë përpjekjet për ndihmë dhe evakuim të popullsisë së prekur.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)