Masakër në Afrikën e Jugut, vriten 9 persona në lokalin e natës

Policia e Afrikës së Jugut është vënë në kërkim të një grupi të armatosur pas një sulmi në një tavernë në Bekkersdal, ku 9 persona humbën jetën dhe 10 të tjerë mbetën të plagosur.

Ngjarja ndodhi rreth orës 01:00 të mëngjesit me orën lokale të së dielës, në një zonë që është e njohur për minierat e saj të arit.

Sipas autoriteteve, rreth 12 persona të paidentifikuar mbërritën në vendngjarje me dy automjete dhe hapën zjarr ndaj klientëve të tavernës. Të shtënat vazhduan edhe teksa autorët u larguan nga zona, duke krijuar panik dhe kaos.

Zyrtari i Policisë Fred Kekana, deklaroi se sulmi ishte i paprovokuar dhe se autorët ishin të armatosur me pistoleta dhe pushkë automatike.

Dy nga viktimat u qëlluan jashtë lokalit ndërsa përpiqeshin të largoheshin, ndërsa një tjetër ishte një shofer taksie që ndodhej pranë për të lënë një pasagjer. Motivi i sulmit mbetet ende i paqartë.

Afrika e Jugut vazhdon të ketë një nga nivelet më të larta të vrasjeve në botë, me dhunën e armëve që mbetet një sfidë e madhe për autoritetet dhe shoqërinë.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)