Japoni, rrjedhje uji radioaktiv nga një central bërthamor

Gjatë punimeve për demontimin e reaktorit eksperimental Fugen në qytetin Tsuruga, ka ndodhur një rrjedhje e vogël uji që përmbante tritium radioaktiv. Autoritetet japoneze të energjisë atomike bëjnë të ditur se rrjedhja ka qenë rreth 20 millilitra dhe se nuk ka shkaktuar dëmtime tek punonjësit apo në ambientin e jashtëm.

Incidenti ndodhi gjatë prerjes së një tubacioni brenda reaktorit, ndërsa tre punonjës ishin në vendngjarje. Ata u larguan menjëherë, duke qenë të pajisur me maska dhe kostume mbrojtëse, dhe nuk ka pasur kontakt apo përthithje të materialit radioaktiv. Kontrolloret e rrezatimit në impiant dhe rrethina nuk kanë regjistruar asnjë parametër anormal.

Megjithatë, përqendrimi i tritiumit brenda zonës së izoluar ka kaluar kufijtë e lejuar nga ligji, ndaj autoritetet kërkuan një raport mbi shkaqet dhe masat parandaluese për të shmangur incidente të ngjashme.

Reaktori Fugen, i cili përdorte plutonium të nxjerrë nga karburanti i shterur, ka ndalur operacionet që në vitin 2003 dhe procesi i demontimit po vazhdon që nga viti 2008. Autoritetet japoneze sigurojnë se situata është nën kontroll dhe nuk paraqet rrezik për publikun.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)