Kina lëshon raketa pranë Tajvanit, 130 avionë “rrethojnë” ishullin

Tensionet në ngushticën e Tajvanit janë përshkallëzuar ndjeshëm, pasi Kina zhvilloi stërvitje ushtarake. Aty u përdorën raketa, duke simuluar rrethimin e ishullit autonom. Gjatë manovrave, të zhvilluara nën mbikëqyrjen e anijeve amerikane në zonë, u panë raketa që shpërthyen në ajër, por edhe në det, duke lënë pas gjurmë tymi të bardhë pranë ishullit kinez Pingtan, pika më e afërt me Tajvanin.

Autoritetet në Tajvan njoftuan se brenda 24 orëve janë evidentuar 130 avionë dhe 22 anije luftarake kineze në afërsi të ishullit. Ky është numri më i lartë i avionëve ushtarakë kinezë i regjistruar në një ditë të vetme që nga 15 tetori 2024. Ndërkohë, Pekini ndërmori simulimin e dytë të rrethimit të Tajvanit gjatë vitit 2025.

Foto nga web

Stërvitjet dyditore, të njohura me emrin “Justice Mission 2025”, nisën të hënën dhe kanë për qëllim bllokimin e porteve kryesore të Tajvanit dhe goditjen e objektivave detare. Ushtria Çlirimtare Popullore e Kinës deklaroi se forcat tokësore të Komandës së Teatrit Lindor zhvilluan ushtrime me zjarr me rreze të gjatë në ujërat në veri të Tajvanit, duke arritur, sipas saj, objektivat e parashikuara.

Foto nga web

Nga ana tjetër, autoritetet në Taipei i kanë cilësuar këto manovra si akte intimidimi ushtarak, që rrezikojnë stabilitetin rajonal. Demonstrimi i fundit i forcës vjen pas shitjeve të konsiderueshme të armëve amerikane për Tajvanin, si dhe deklaratave të kryeministres japoneze Sanae Takaichi, e cila sugjeroi se një sulm ndaj Tajvanit mund të justifikonte një reagim ushtarak nga Japonia.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)