Mori pjesë në tentativën për grusht shteti, 23 vite burg për ish-kryeministrin e Koresë së Jugut

Një gjykatë në Korenë e Jugut vendosi të mërkurën të dënojë me 23 vjet burg ish-kryeministrin Han Duck-soo, i cili akuzohej për përfshirjen në tentativën për grusht shteti në lidhje me shpalljen e gjendjes ushtarake nga ish-Presidenti Yoon Suk Yeol në dhjetor 2024.

Gjykata e Qarkut Qendror të Seulit e shpalli Han fajtor sepse ai u konsiderua si instrumenti kyç në krijimin e situatave në një mbledhjeje kabineti që lehtësuan shpalljen e gjendjes ushtarake. Gjyqtari që vendosi për dënimin e Han e quajti lëvizjen që ai dhe Presidenti tentuan, një "kryengritje nga lart poshtë".

Foto: AP/Chung Sung-Jun

"I pandehuri ishte Kryeministër, të cilit i ishte dhënë në mënyrë indirekte legjitimitet dhe përgjegjësi demokratike. Megjithatë, i pandehuri zgjodhi të mbyllte sytë dhe të merrte pjesë si anëtar i kryengritjes së 3 dhjetorit. Si rezultat i veprimeve të të pandehurit, Koreja e Jugut ishte në rrezik të kthehej në të kaluarën e errët kur të drejtat themelore dhe rendi liberal demokratik i popullit u shkelën, duke i penguar ata potencialisht të shpëtonin nga moçali i diktaturës për një kohë të gjatë”, tha gjyqtari.

Gjykata e shpalli Hanin fajtor edhe për akuza për dëshmi të rreme, si dhe krijimin e një dokumenti zyrtar fals.

Han kishte mohuar shkeljet për të gjitha akuzat, përveç dëshmisë së rreme të pjesshme. 76 vjeçari është ish-kryeministri i parë për të cilin një gjykatë ka marrë vendim për akuza penale që lidhen drejtpërdrejt me vendosjen e gjendjes ushtarake. Avokati i Hanit tha se vendimin do ta apelojnë deri në Gjykatën Supreme.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)