OBSH ngre alarmin për virusin me vdekshmëri deri në 75 përqind

Autoritetet shëndetësore në Indi kanë konfirmuar disa raste infektimi me virusin Nipah, një sëmundje e rrallë por jashtëzakonisht e rrezikshme, e cila ka një shkallë vdekshmërie që varion nga 40 deri në 75 për qind te njerëzit. Rastet janë zbuluar pranë shtetit të Bengalit Perëndimor, një zonë me rreth 100 milionë banorë, duke ngritur shqetësime për përhapje të mëtejshme.

Sipas Organizatës Botërore të Shëndetësisë, aktualisht nuk ekzistojnë trajtime specifike apo vaksina as për njerëzit dhe as për kafshët. Trajtimi për pacientët konsiston kryesisht në masa mbështetëse dhe monitorim intensiv. Deri më tani janë raportuar pesë raste në Indi, me një viktimë që kishte përfunduar më parë në koma.

Virusi Nipah transmetohet nga kafshët te njerëzit, kryesisht nga lakuriqët e natës, si dhe mund të përhapet edhe nga personi te personi. Infektimi ndodh shpesh përmes konsumimit të ushqimeve të kontaminuara me sekrecione të këtyre kafshëve.

Simptomat te njerëzit përfshijnë vështirësi në frymëmarrje, temperaturë të lartë, kollë të fortë, dhimbje fyti dhe të vjella. Në rastet më të rënda, sëmundja mund të shkaktojë encefalit, konvulsione dhe koma brenda 24-48 orëve. Autoritetet shëndetësore po ndjekin nga afër situatën dhe kanë shtuar masat e monitorimit për të parandaluar përhapjen e virusit.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)