“Turp të të vijë”, kryeministri australian Albanese hyn në xhami, besimtarët e presin me protestë

Kryeministri auastralian Anthony Albanese të premten shkoi për një vizitë në xhaminë më të madhe të Australisë, për lutjet e Fitër Bajramit, por u prit me protesta nga qindra besimtarë të mbledhur aty, të cilët shprehën zemërim për qëndrimin e tij ndaj ofensivës së Izraelit në Gaza.

Protestuesit ngacmuan dhe fishkëllyen kryeministrin duke shprehur qartë revoltën e disa prej komuniteteve myslimane dhe hebraike të Australisë, të cilat janë të zemëruara për qasjen që qeveria e qendrës së majtë ka ndjekur që nga fillimi i luftës në Gaza.

Albanese ka shprehur shqetësim për palestinezët, duke kërkuar vazhdimisht një armëpushim, por njëherësh ka mbështetur të drejtën e Izraelit për vetëmbrojtje.

Sakaq imazhet tregojnë se protestuesit ndërprenë procedurat e faljes rreth 15 minuta pasi Albanese dhe ministri i Punëve të Brendshme Tony Burke iu bashkuan besimtarëve në xhaminë Lakemba, në Sidnejn perëndimor për të shënuar fundin e muajit të agjërimit.

Demonstruesit fishkëllyen, i thanë Albanese-s dhe Burke "dilni jashtë" dhe i quajtën ata "mbështetës të gjenocidit", duke iu referuar vrasjes së palestinezëve nga Izraeli në Gaza, pas një sulmi nga militantët e Hamasit në vitin 2023.

"Vëllezër dhe motra të dashur, qëndroni pak të qetë", i tha një nga organizatorët turmës, duke i nxitur njerëzit të ulen dhe të ndalojnë së filmuari protestën. "Është Bajram. Është një ditë e gëzueshme", shtoi ai.

Foto: Web

Ndërkohë, një roje sigurie u pa duke e rrëzuar përtokë njërin nga ata që e ngacmonin përpara se ta shoqëronte. "Turp të keni!", bërtitën protestuesit që ndoqën Albanese-n dhe Burke kur ata u larguan.

“Mbledhja në xhami ishte jashtëzakonisht pozitive", tha Albanese më vonë, pavarësisht incidentit.

"Nëse keni disa njerëz që ngacmojnë në një turmë prej 30,000 vetësh, kjo duhet parë në atë perspektivë", u tha ai gazetarëve, duke shtuar se komuniteti ishte përballur me disa nga ata që bënë zhurmë.

Ai shtoi se njëfarë frustrimi buroi nga përcaktimi këtë muaj i organizatës islamiste Hizb ut-Tahrir si një grup urrejtjeje, i ndaluar nga qeveria në bazë të ligjeve të nxitura nga të shtënat vdekjeprurëse në plazhin Bondi të Sidneit më 14 dhjetor.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)