Konferenca e Kryetarëve nis me debate për Rregulloren e Kuvendit, rrëzohen kërkesat e opozitës për komisione hetimore

Konferenca e Kryetarëve ka nisur mbledhjen me debate teksa socialistët kërkojnë të futet në punimet e Kuvendit ndryshimet  e Rregullores, teksa PD e kundërshton. 

Teksa diskutohet projektkalendari për punimet parlametare 13-30 prill, PD kundërshton votimin për ndryshimet e rregullores së Kuvendit me argumentin se Gjykata Kushtetuese rrëzoi rritjen e numri të komisioneve parlamentare. 

Me vetëdije ju e keni shkelur Kushtetutën. Dhe jo një herë, por dy herë. Me 8 me 0, Gjykata Kushtetuese ka thënë se Kryetari i Kuvendit e ka hedhur në erë Kushtetutën. Pra, Gjykata Kushtetuese na dha të drejtë për shkarkimin tuaj, por ju e keni rrëzuar atë me votë politike.

Prandaj, ndryshimet e rregullores nuk janë emergjente, sepse Gjykata Kushtetuese nuk e ka zbardhur ende vendimin. Pra, nuk ka çështje urgjente për ta trajtuar. Po ju them: Gjykata Kushtetuese nuk e ka zbardhur vendimin. Prandaj, jua kërkoj me mirësjellje të bëheni garant i Kushtetutës. Parlamenti nuk mund të jetë tekë”, ka thënë Bardhi në konferencë.

Socialistët rrëzuan kërkesat e opozitës për  ngritje të komisioneve hetimore për AKSHI dhe për shembjen e rrugëve. Më herët Grupi Parlamentar i Partisë Demokratike kishte depozituar në Kuvend kërkesën zyrtare për ngritjen e një Komisioni Hetimor parlamentar për Agjencinë Kombëtare të Shoqërisë së Informacionit.

Kërkesa i është drejtuar kryetarit të Kuvendit dhe synon kontrollin e ligjshmërisë së funksionimit të AKSHI-t, vlerësimin e sigurisë kibernetike dhe mbrojtjes së të dhënave personale, si dhe analizimin e rreziqeve për sigurinë kombëtare dhe detyrimet e Shqipërisë si vend anëtar i NATO-s.Deputetët demokratë argumentojnë se AKSHI administron infrastrukturën më kritike digjitale të vendit, përfshirë platformën e-Albania dhe të dhënat personale të qytetarëve, ndaj funksionimi i saj lidhet drejtpërdrejt me sigurinë kombëtare.

Në kërkesë përmenden edhe zhvillimet e fundit hetimore nga SPAK, ku janë ngritur akuza për një skemë të dyshuar kriminale që lidhet me tenderat e AKSHI-t, si dhe raste të mëparshme të rrjedhjes së të dhënave dhe sulmeve kibernetike që kanë prekur sistemet shtetërore.

Sipas opozitës, këto ngjarje ngrenë dyshime serioze për keqmenaxhim, mungesë kontrolli institucional dhe rrezik të mundshëm për sigurinë digjitale të vendit.

Komisioni Hetimor i propozuar do të ketë për objekt verifikimin e procedurave të prokurimit të AKSHI-t për periudhën 2014–2026, analizimin e aksesit të kompanive private në sistemet shtetërore, hetimin e rrjedhjeve të të dhënave dhe nxjerrjen e përgjegjësive institucionale.

Pesë ditë më parë edhe Partia e Lirisë kërkoi zyrtarisht pas dëmtimeve të rrugës Librazhd- Prrenjas hetim për ARRSH-në. 

Kërkesat konsistojnë në ngritjen e një komisioni hetimor që kontrollon ligjshmërinë e veprimeve të institucioneve, ARRSH, standardeve të ndërtimit etj. Komisioni duhet të ketë 9 anëtarë ku kryetari dhe 3 anëtarë t’i përkasin opozitës dhe 5 mazhorancës, ndërsa miratimi duhet të ndodhë në seancën plenare më të afërt. 

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)