Zyrtare: Shqipëria i merr një tjetër lojtar Kosovës, FIFA i “prish” surprizën Sylvinho-s

Shqipëria afron një tjetër futbollist me origjinë nga Kosova. FIFA ka miratuar kalimin e mbrojtësit Bujar Pllana te Kombëtarja kuqezi, duke konfirmuar kështu afrimin e ri në skuadër. Qeveria botërore ka publikuar vendosjen e 24-vjeçarit nën urdhërat e Sylvinho-s, duke i paraprirë surprizën trajnerit.

Talenti ka luajtur në të kaluarën tre ndeshje me përfaqësuesen e 21-vjeçarëve të Kosovës, por në fund ai zgjodhi të luajë me fanellën që përfaqëson shqiptarët në të gjitha trojet. FIFA e miratoi kërkesën e FSHF-së, edhe sepse Pllana nuk ka luajtur asnjë ndeshje me ekipin “A” të Dardanëve.

Foto nga web

Trajneri Sylvinho i ka dërguar ftesë mbrojtësit, i cili mund të aktivizohet si në qendër të repartit difensiv, ashtu edhe në krahun e djathtë. Gjatë këtij sezoni në Superligën polake, Pllana ka zhvilluar 11 ndeshje, duke grumbulluar 794 minuta në fushë. 24-vjeçari është pjesë e Lechia Gdańsk, teksa më parë ka luajtur me Slaven Belupo, Prishtinën, Feronikeli dhe Trepça ’89.

Një tjetër afrim që pritet në Kombëtare është edhe mbrojtësi i majtë i AEK Athinës, Stavros Pilios. Dilemat nëse këta lojtarë do të jenë të ftuar, pritet të zgjidhen shumë shpejt, në momentin kur Sylvinho të zbulojë listën me futbollistët e grumbulluar për ndeshjen “play-off” të Botërorit 2026 kundër Polonisë, që do të luhet më 26 mars në Varshavë.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)