“Grua e vogël, fashiste”, prezantuesi rus fyen Melonin, Italia thërret ambasadorin

Një valë reagimesh politike është ndezur në Itali pas deklaratave fyese të bëra në një emision televiziv rus ndaj kryeministres italiane Giorgia Meloni.

Gjatë një transmetimi të programit “Polnyj Kontakt”, gazetari dhe moderatori rus Vladimir Solovyov, i njohur për qëndrimet e tij pro-Kremlinit, përdori gjuhë fyese duke e cilësuar Melonin “një grua të vogël e të keqe dhe fashiste”.

Ai shkoi më tej duke bërë akuza politike ndaj saj, përfshirë pretendime për “tradhti” dhe qëndrime të ndryshueshme në raport me aleatët ndërkombëtarë.

Deklaratat e tij janë konsideruar të papranueshme nga autoritetet italiane dhe kanë shkaktuar reagim të menjëhershëm diplomatik.

Ministri i Jashtëm italian Antonio Tajani bëri të ditur se është thirrur ambasadori rus në Romë për të shprehur një notë protestë zyrtare lidhur me gjuhën e përdorur ndaj kreut të qeverisë italiane. Sipas tij, deklarata të tilla janë të papranueshme dhe cenojnë marrëdhëniet institucionale.

Reagime të forta kanë ardhur edhe nga drejtuesit më të lartë të institucioneve italiane. Presidenti i Senatit, Ignazio La Russa, i cilësoi deklaratat si të turpshme dhe të rënda, duke shprehur solidaritet të plotë me kryeministren. Në të njëjtën linjë u shpreh edhe presidenti i Dhomës së Deputetëve, Lorenzo Fontana, i cili dënoi gjuhën fyese dhe theksoi se ajo cenon dinjitetin institucional.

Solidaritet ndaj Melonit kanë shprehur edhe përfaqësues të opozitës. Giuseppe Conte deklaroi se ofendime të tilla janë të papranueshme, ndërsa liderja e Partisë Demokratike, Elly Schlein, i cilësoi ato si sulme të rënda dhe me përmbajtje seksiste, duke theksuar se sulmi ndaj përfaqësuesve të institucioneve italiane është sulm ndaj vetë vendit.

Edhe lideri i opozitës së djathtë, Matteo Salvini, dhe ish-kryeministri Matteo Renzi shprehën solidaritet të plotë me Melonin, duke dënuar gjuhën e përdorur në programin televiziv rus.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)