112 vjeçe! Britanikja zbulon sekretin e një jete të gjatë dhe të lumtur

Një nga gratë më të moshuara në Britaninë e Madhe ka festuar sot 112-vjetorin e lindjes, duke ndarë edhe sekretin e saj për një jetë të gjatë dhe të lumtur. Marjorie Hodnett Aylward, e njohur ndryshe si “Aunt Marj”, është aktualisht personi më i moshuar në veriperëndim të vendit dhe e pesta më e moshuara në gjithë Mbretërinë e Bashkuar.

Ajo ka festuar ditëlindjen në rezidencën Formby Manor në Merseyside, ku jeton prej gjashtë vitesh, e rrethuar nga stafi dhe miqtë, me një festë tradicionale çaji, sanduiç dhe tortë. Për këtë rast, ajo ka marrë mbi 125 kartolina urimi, përfshirë edhe një mesazh të veçantë nga Mbreti Charles.

E pyetur për sekretin e jetëgjatësisë, “Aunt Marj” jep një mesazh të thjeshtë, por domethënës: “Shiko përpara me shpresë dhe jo pas me pendesë”. Ajo shton se “Jeta është për t’u jetuar dhe varet nga ti ta shfrytëzosh sa më mirë”, duke theksuar rëndësinë e mirësisë dhe përkushtimit ndaj të tjerëve në çdo moment të jetës.

E lindur në Londër në vitin 1914, ajo ka përjetuar më shumë se një shekull histori, duke kaluar dy luftëra botërore dhe ndryshime të mëdha shoqërore. Pavarësisht humbjeve personale në jetë, ajo ka vazhduar të qëndrojë aktive dhe e angazhuar, duke punuar për vite si mësuese dhe duke kultivuar pasionet e saj për leximin, poezinë dhe pikturën.

“Vërtet nuk e prisja të arrija 112 vjeç, por jam e lumtur që jam këtu dhe kam kaq shumë për të festuar”, shprehet ajo.

Edhe sot, në këtë moshë, “Aunt Marj” vazhdon të jetë aktive dhe e interesuar për jetën, duke dëshmuar se optimizmi dhe qëndrimi pozitiv janë çelësi i një jete të gjatë.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)