Holta Zaçajt i përfundoi mandati, Gjykata Kushtetuese nis procedurat për zgjedhjen e kryetarit të ri

Pas përfundimit të mandatit të kryetares së Gjykatës Kushtetuese, Holta Zaçaj, Mbledhja e Gjyqtarëve e thirrur nga kryetarja në detyrë, Marsida Xhaferllari, vendosi nisjen e procedurave për zgjedhjen e drejtuesit të ri të kësaj gjykate.

Në njoftimin zyrtar të Gjykatës Kushtetuese thuhet se “kërkesa me shkrim për shprehje interesi nga gjyqtarët mund të paraqitet jo më vonë se 5 ditë nga hyrja në fuqi e këtij vendimi”.

Foto: Newsmax Balkans

Ndërkohë, anëtari i ri i Gjykatës Kushtetuese do të ketë një mandat të plotë 9-vjeçar.

Pas debatit të krijuar mbi mandatin e Zaçaj, Gjykata e Lartë konfirmoi se mandati i saj përfundoi më 10 mars 2025. Sipas këtij institucioni, njoftimi për mandatin e saj aktual është bërë që në vitin 2021, kur u përcaktua se vendi vakant i krijuar pas largimit të Vitore Tushes, së cilës i kishte përfunduar mandati në vitin 2017, do të plotësohej nga një gjyqtar që do të qëndronte në detyrë deri në mars 2025.

Në njoftim thuhet se “Holta Zaçaj u zgjodh në 16 janar 2023 si gjyqtare e Gjykatës Kushtetuese, ‘me mandat të pjesshëm, deri në kryerjen e ripërtëritjes në vitin 2025’”.

Më 10 dhjetor, Zaçaj bëri të ditur se nuk e njeh datën 10 mars 2025 si përfundim të mandatit të saj dhe njoftoi se do t’i drejtohej Komisionit të Venecias për një opinion zyrtar. Ajo i ka paraqitur këtij institucioni katër pyetje, përfshirë edhe atë se si përcaktohet mandati i një anëtari të Gjykatës Kushtetuese kur ai nis me vonesë.

Foto: Newsmax Balkans

Ndërkohë, duke iu referuar dispozitave kushtetuese, Gjykata e Lartë thekson rëndësinë e ciklit të rregullt të ripërtëritjes së Gjykatës Kushtetuese çdo tre vjet me një të tretën e anëtarëve.

Në vendimin e saj theksohet se “përtëritja e përbërjes së Gjykatës Kushtetuese është një proces i detyrueshëm për t’u kryer në kohë nga tre organet e emërtesës, me qëllim shmangien e çdo krize a tensioni, që mund të cenojë legjitimitetin dhe funksionimin normal të vetë Gjykatës, si autoriteti më i lartë që interpreton në mënyrë përfundimtare Kushtetutën”.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)