Miqësia Shqipëri-Ukrainë nderohet në Kiev, Zelensky dekoron Spiropalin me Urdhrin e Lartë Shtetëror

Presidenti i Ukrainës, Volodymyr Zelensky, i dorëzoi sot Urdhrin e Princeshës Olga, Klasi I, një nga dekoratat më të larta të shtetit ukrainas, ministres për Evropën dhe Punët e Jashtme, Elisa Spiropali.

Dekorata iu akordua Spiropalit për kontributin e saj në forcimin e bashkëpunimit ndërshtetëror dhe mbështetjen e sovranitetit dhe integritetit territorial të Ukrainës, si edhe për veprimtarinë e saj bamirëse në shërbim të shtetit ukrainas. Urdhri iu dha në cilësinë e Kryetares së Kuvendit të Shqipërisë, detyrë që ajo ka mbajtur gjatë periudhës 2024–2025.

Foto: Facebook/Elisa Spiropali

Në dekretin e Presidentit të Ukrainës thuhet se vlerësimi jepet “për kontributin e çmuar personal në forcimin e bashkëpunimit ndërshtetëror në mbështetjen e sovranitetit dhe integritetit territorial të Ukrainës si dhe për veprimtarinë e saj bamirëse në shërbim të shtetit ukrainas”.

Duke reaguar pas marrjes së dekoratës, Spiropali u shpreh se ky nderim i përket jo vetëm një individi, por qëndrimit të Shqipërisë dhe të çdo europiani që zgjedh të qëndrojë në anën e lirisë.

Spiropali vlerësoi gjithashtu simbolikën e urdhrit, që mban emrin e princeshës Olga, një figurë historike që udhëhoqi me dinjitet në kohë të vështira, duke theksuar se marrja e kësaj dekorate gjatë një lufte për mbijetesë dhe liri përbën një përgjegjësi morale po aq sa një nder.

Foto: Facebook/Elisa Spiropali

Duke iu drejtuar presidentit Zelensky, Spiropali e cilësoi këtë vlerësim si një nga nderimet më të mëdha të jetës së saj publike, duke nënvizuar se ai përfaqëson edhe marrëdhëniet e shkëlqyera mes Shqipërisë dhe Ukrainës, në një periudhë sfiduese për të dy vendet.

Ajo theksoi se Ukraina, përmes rezistencës së saj, po mbron ndërgjegjen e Europës dhe të ardhmen e paqes në kontinent.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)