I gjenden pistoleta, armë gjahu dhe kokainë, në pranga 2 persona në Tiranë

Policia e Tiranës ka finalizuar operacionin e koduar “Hunter”, me synim goditjen e armëmbajtjes pa leje dhe aktivitetit të paligjshëm me lëndë narkotike. Aksioni u zhvillua nga Komisariati Nr. 1 dhe përfundoi me arrestimin e dy shtetasve dhe sekuestrimin e një sasie të konsiderueshme armësh dhe municionesh.

Në pranga ranë Ilir Dushku, 29 vjeç, banues në Tiranë, i dënuar më parë për “Plagosje të rëndë me dashje” dhe “Heqje të paligjshme të lirisë”, si dhe Bjorli Xhabrahimi, 22 vjeç, po nga Tirana. Dy të rinjtë u ndaluan në zonën e Mjull Bathores, ku dyshohet se qarkullonin të armatosur.

Policia e Shtetit

Gjatë kontrollit fizik, policia gjeti tek Dushku një armë gjahu teke dhe 29 fishekë, ndërsa Xhabrahimi mbante një tjetër armë gjahu. Të dyja armët janë sekuestruar.

Kontrollet vijuan në banesën e 29-vjeçarit, ku policia zbuloi edhe arsenal shtesë:
– 2 pistoleta,
– municion luftarak,
– 1 armë të ftohtë,
– si dhe një sasi të vogël kokaine.

Të gjitha provat janë sekuestruar, ndërsa hetimet po vijojnë në bashkëpunim me Prokurorinë e Tiranës për dokumentimin e plotë të ngjarjes dhe identifikimin e mundshëm të personave të tjerë të përfshirë.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)